କବିତା
କବିର କଳ୍ପନା ମନର ଭାବନା
ଅନ୍ତ ସଲୀଳାର ଧାରା
ସୁକୁମାର ଭାବ ମନର ଉଦବେଗ
ପ୍ରାଣ ମନ୍ଦାକିନୀ ପରା।
ପ୍ରୀତିମୟ ଭାବ ଗୀତିମୟ ସ୍ବର
ଚେତନାର ଚୌହଦୀରେ
ଉଦବେଳିତ ପ୍ରବାହିତ ଗୀତିକା
ଭାବନାର ପ୍ରାଚୁର୍ଯ୍ୟରେ।
କଳ କଲ୍ଲୋଳିନୀ ହେ ମଧୁଭାଷିନୀ
ଶାଶ୍ବତ ପ୍ରେମର ଗାଥା
କଳ୍ପନାର ଇନ୍ଦ୍ରଜାଲେ ଛନ୍ଦାୟିତ
କବିର ମନର ବ୍ଯଥା।
ମାଧୁର୍ଯ୍ୟ ମହକେ ସୁଶୋଭିତ ଧାରା
କୋମଳତା ଭାବ ନେଇ
ପ୍ରାଣ ପାରିଜାତ ହୁଅଇ ଶୋଭିତ
ପ୍ରୀତିମୟ ଗୀତିଗାଇ।
ମନର ମହକ ମଧୁଗୀତି ନେଇ
ପୁଲକିତ ମଧୁମନ
ତୁମ ଆଗମନେ ଫଗୁଣ ଆଗତ
ଲାସ୍ଯମୟୀ ଫୁଲବନ।
ତୁମେ ରଚିପାର ଇନ୍ଦ୍ରଧନୁ ଶୋଭା
ଡହଡହ ଗ୍ରୀଷମରେ
ବିଧୁର ପ୍ରାଣରେ ପ୍ରୀତି ମନ୍ଦାକିନୀ
ନିର୍ଝର ଝରେ ମରୁରେ।
ଗହନ ମନର ଗୋପନ ବାରତା
ଫୁଟି ଉଠ ମଧୁସ୍ବରେ
ବିଦଗ୍ଧ ମନର ପ୍ରାଣସତ୍ତା ସତେ
ବିମୁଗ୍ଧେ ପ୍ରସାରି ଝରେ।
ଡଃ ପ୍ରିୟମ୍ବଦା ସାମଲ
ଭୁବନେଶ୍ୱର।
53 total views, 2 views today