ହସିବ ପ୍ରକୃତି ରାଣୀ
ଉଗ୍ର ରୂପ ଧରି ନିଦାଘ ଆସିଛି
ଅଗ୍ନି ବର୍ଷେ ଆକାଶରୁ ,
ପବନ ଲୁଚିଛି ପ୍ରକୋପରେ ତା’ର
ଦେଖି ଗୁଳଗୁଳି ଦୂରୁଁ ।
ବୃକ୍ଷଶୂନ୍ଯ ଏହି ଧରଣୀ ଲାଗଇ
ନିଆଁର ପିଣ୍ଡୁଳା ପ୍ରାୟ ,
ତଡ଼ାଗ ତଟିନୀ ହୋଇ ଜଳ ଶୂନ୍ଯ
ଲାଗେ ମରିଚୀକା ମୟ ।
ପଶୁ ପକ୍ଷୀ ଗଣ ଡହଳ ବିକଳ
ମଣିଷର ଭୁଲ ପାଇଁ ,
କେ ହୁଏ ନିଶ୍ଚିହ୍ନ କେ ପାଏ କଷଣ
ଜଳ କଷ୍ଟ ଯାଏ ନାହିଁ ।
ପରିବେଶ ଆଜି ହେଉଛି ଦୂଷିତ
ଅମ୍ଳଜାନ ଅଭାଭରୁ ,
ବୃକ୍ଷର ଶୂନ୍ଯତା ଅନୁଭୂତ ହୁଏ
ଉତ୍ତାପ ବୃଦ୍ଧି ଦୃଷ୍ଟିରୁ ।
ବୃକ୍ଷ ଲଗାଇଲେ କମିବ ଉତ୍ତାପ
ବୃଷ୍ଟିପାତ ଯିବ ବଢ଼ି ,
ଭୂତଳ ଜଳର ସ୍ତର ବୃଦ୍ଧି ହେବ
ତଡ଼ାଗ ତଟିନୀ ଭରି ।
ପ୍ରକୃତିର ଦାନ ଜଙ୍ଗଲ ପାହାଡ଼
ଝରଣା ସୁରକ୍ଷା କରି ,
ବଢ଼ାଇବା ଗଛ ନକାଟି ତାହାକୁ
ଦେବ ପ୍ରାୟ ମନେ ଧରି ।
ଶ୍ରେଷ୍ଠଜୀବ ଆଖ୍ଯା ପାଇଛନ୍ତି ଆମେ
ରଖିବା ଜଗତ ଜାଣି ,
ଆମରି ହାତରେ ଏ ଧରା ହସିବ
ହସିବ ପ୍ରକୃତି ରାଣୀ ।
ଜୟ ଶ୍ରୀଜଗନ୍ନାଥ।
ତରୁଣ କୁମାର ମିଶ୍ର।
ଖଣ୍ଡଗିରି ,ଭୁବନେଶ୍ବର ।
