କିଶଳୟ ହସେ…
କିଶଳୟ ହସେ….ହସେ ବସନ୍ତ,
ବିପ୍ରଲବ୍ଧା ଊର୍ବୀ ଚେତି ଘୁମନ୍ତ
କୋକିଳ ତାନରେ ମଳୟ ବୀଣାରେ
ପ୍ରକୃତ୍ତି ଝରାଏ ମଧୁ ସଙ୍ଗୀତ,
ବିହୋରେ ବିହରେ ଋତୁ ସାମନ୍ତ.
ଫୁଲର ପସରା ମେଲିଛି ଧରା,
ବନ ଉପବନ ଦିଶଇ ତୋରା,
ଯାଇ ଜୁଇ ଚମ୍ପା ଚାମେଲି ଚହଟେ,
ଅଶୋକ ସକଳ ଶୋକ ପାଶୋରା
ପଳାସ ଶିମୁଳି ଲାଲିମା ଭରା.
ସବୁଜ ଲାଳିତ୍ୟ ବିଟପ ସାରା
କୃଷ୍ଣଚୂଡ଼ା ଅଙ୍ଗ ଲାବଣ୍ୟ ଝରା
ତନୁରୁ ତନିମା ଛୁଇଁଛି ଫଗୁଣ
ଫଗୁ ଫଗୁ ବାସେ ଅନିଳ ପୂରା
ମାଳତୀ ମହକେ ଅଗଣା ତୋରା.
କୁହୁ କୁହୁ ଶୁଭେ ପିକ କୁଜନ
ଗୁଣୁ ଗୁଣୁ ଭ୍ରମରର ଗୁଞ୍ଜନ
ଭୁରୁ ଭୁରୁ ବାସ ବନେ ଉପବନେ
ସୁଲୁସୁଲୁ ପଣେ ବହେ ବ୍ୟଜନ
ଜୁଡୁବୁଡୁ ରଙ୍ଗେ ସକଳ ଜନ.
ସହକାର ଅଙ୍ଗେ ବଉଳ ଭିଡ଼
ବିହଙ୍ଗ ସଜାଏ ସୁନ୍ଦର ନୀଡ଼,
ହଳଦୀ ବସନ୍ତ ନାଇଚି କଜଳ
ସରସୀ ଶିଖରେ କମଳ କଢ଼
ମଲ୍ଲୀ ମୁଚୁକୁନ୍ଦ ମହକ ବଡ.
ପ୍ରଣୟ ପ୍ରଲେପ ଆକାଶ ସାରା
ଚପଳ ଚଇତି ହୃଦୟ ଚୋରା
ଦିଗବଳୟ ଭୁରୁ ନୀଳାଞ୍ଜନେ ଅଙ୍କା
ପୋଡା ଚଇତିଟା ମରମ ଜଳା
ନିଦାଘ ଚିଟାଉ ଆଣେ ସେ ପରା.
ଦେହ ଦେହଳୀ କୁ ଛୁଏଁ ଫଗୁଣ,
ଅବିର ପକ୍ଷରେ ଗାଁ ରେ ମେଲଣ
ଭିଜା ଭିଜା ପ୍ରେମେ ରାଈ ବିନୋଦିଆ
ଦିବ୍ୟ ପୁଲକରେ ମନ କାନନ
ମୁକୁଳ ମଣ୍ଡିତ ବନ ଗହନ.
ଇନ୍ଦ୍ରଧନୁ ସାତ ରଙ୍ଗକୁ ନେଇ
ରାଜକୀୟ ରଙ୍ଗ ଭଙ୍ଗୀ ଭିଆଇ
ଵିପଞ୍ଚି ବାଦିନୀ ଅଗମନୀ ସାଥେ
ଜାଗର ଆଲୋକେ ସର୍ବେ ଜଗାଇ
ରସ ରାସ ରସେ ରଂଜିତ ମହୀ…..
ମିନତୀ ଦାଶ
ବାରିପଦା.
