ଶହୀଦ ଲକ୍ଷ୍ମଣ ନାୟକ
ମର୍ତ୍ତ୍ୟରେ ଜନମି ମରିବ ମଣିଷ
ଜୀବନ ବୃତ୍ତାନ୍ତ ସତ୍ୟ
ତ୍ୟାଗ ତିତିକ୍ଷାରେ ଅମରତ୍ୱ ପ୍ରାପ୍ତି
ଶହୀଦ ଜୀବନୀ ତତ୍ତ୍ୱ।
କୋରାପୁଟ ଜିଲ୍ଲା ତେନ୍ତୁଳିଗୁମ୍ମାର
ଅକ୍ଷୟ କୀରତି ସେହି
ନଭେମ୍ବର ମାସ ବାଇଶି ତାରିଖେ
ଜନ୍ମିଥିଲେ ମର୍ତ୍ତ୍ୟ ଭୂଇଁ।
ମାଲକାନଗିରି ଗାନ୍ଧୀ ରୂପେ ସିଏ
ବିଖ୍ୟାତ ଓ ପରିଚିତ
ମାତୃଭୂମି ପାଇଁ ମମତା ଢାଳି ସେ
ମରି ବି ଅମର ନିତ୍ୟ ।
ହସିହସି ସିଏ ଝୁଲିଲେ ଫାଶୀରେ
ଡରି ତ ନଥିଲେ ଜମା
ଇତି ହେଲେ ବି ସେ ଇତିହାସ ବକ୍ଷେ
ସ୍ମୃତି ପ୍ରୀତି ସମ୍ବର୍ଦ୍ଧନା।
ନିର୍ବାପିତ ସିନା ଜୀବନ ପ୍ରଦୀପ
ଆଲୋକବର୍ତ୍ତିକା ସେ ଯେ
ନିର୍ଭୀକ ଶହୀଦ ଲକ୍ଷ୍ମଣ ନାୟକ
ଜୟନ୍ତୀରେ ଆଖି ଭିଜେ।
ଫିରିଙ୍ଗି ଶାସନ ହଟାଇବା ପାଇଁ
ଇଚ୍ଛା ଶକ୍ତି ଥିଲା ଚେଇଁ
ଦେଶ ହିତୈଷୀ ସ୍ୱଭାବ ସାଧୁତା
ଯଶସ୍ୱୀ ମନସ୍ୱୀ ସେହି।
ବୀର ମରେ ଅବା ମାରେ କରି ରଣ
ବଞ୍ଚିବା ବିଶ୍ବାସ ତାଙ୍କ
ଆଦିବାସୀଙ୍କର ଅଧିକାର ପାଇଁ
ସୁରକ୍ଷା କବଚ ଟେକ।
ଭୂୟାଁ ସଂପ୍ରଦାୟ ସୁବିଧା ସୁଯୋଗ
ସହାୟତା ସମର୍ଥନ
ଜୀବନୀ ତୋଳୁଛି ଜଗତରେ ଶିକ୍ଷା
ଜନ୍ମ ନୁହେଁ ବଡ କର୍ମ।
ଅରଣ୍ୟାନି କୋଳ ମଣିଷଟିଏ ଯେ
ଅନନ୍ୟ ଜୀବନ ଯାତ୍ରା
ପାହାଡୀ ଇଲାକା ନିରୀହ ସଂଗ୍ରାମୀ
ମାନତି ମାନସ ମାତ୍ରା।
ସ୍ମୃତିଚାରଣରେ ମନେ ସେ ପଡନ୍ତି
ଦେଶପାଇଁ ବଳିଦାନ
ସାହସୀ ଶହୀଦ ଲକ୍ଷ୍ମଣ ନାୟକ
ଅଭୁଲାର ନିଦର୍ଶନ ।
ରାକମା, ଭାପୁର, ନୟାଗଡ଼