*ଫରକ୍*
ଚିହ୍ନା ଲାଗିଲ
ମନେ ହେଲା କାହିଁକି କେଜାଣି
କେତେ ଯୁଗରୁ ତମ ସାଥିରେ ମୋର
ବାକି ଅଛି ଅନେକ ହିସାବ ।
ପ୍ରଥମ ଦେଖା
ଆଖିରେ ଆଖିରେ
ହଠାତ୍ ଦିନେ ପାଇଗଲି
ତୁମକୁ ମୋ ଘର ସାମ୍ନା ଗଳିରେ !
ଦେଖି ହସିଲ,
ତମ ହଳେ ଆଖି
କିଛି କହିବାକୁ ଚାହୁଁ ଥିଲା,
ହେଲେ ତମେ ଫେରେଇ ନେଲ
ଦୂରେଇ ଯାଇ ଦୁଇ ତିନି ଥର
କଣେଇ କଣେଇ ଚାହିଁଲ ।
ଚାହିଁବାର କିଛି କ୍ଷଣପରେ
ଶ୍ରାବଣର ଫୁଲେଇ ନଈ
ମୋ ଆଖି କୋଣରୁ
ଆହୁରି ଫୁଲେଇ ହେବାକୁ ଲାଗିଲା
ଅତୀତର ସ୍ମୃତିକୁ ଜାବୁଡି ଧରି ।
ତମ ସହ ବିତିଥିଲା
ଦୀର୍ଘ ଦୁଇ ବର୍ଷ ଆୟୁଷ,
ଶୁଖିଲା ମନକୁ ବସନ୍ତର ବାସ୍ନାରେ
ଫଗୁଣର ଜ୍ୟୋସ୍ନାରେ
ବତୁରେଇବାର ନିଶାରେ
ସେଦିନ ମାଗିଥିଲି ଆଞ୍ଜୁଳାଏ ହସ,
ହେଲେ ପାଇଲି
ଆଞ୍ଜୁଳେ ବଦଳରେ ସମୁଦ୍ରେ ଲୁହ ।
ଦେଖିବାକୁ ଚାହିଁ ଥିଲି
ତୁମରି ଆଖିରେ ହଜାରେ ସପନ,
ସେପାଇଁ ଶୃଗାଳ ପରି ମାଗି ବସିଲି
ମଲ୍ଲୀଫୁଲ ଶେଜ ଆଉ କିଛି ଚିହ୍ନା ରାତି ।
ସେବେଠୁ ସୂତ୍ରପାତ
ମୋ ହୃଦୟରେ ତୃତୀୟ ବିଶ୍ୱ ଯୁଦ୍ଧ
ବଞ୍ଚୁଥିବା ଠିକଣା ହାଯିବା ଯାଏଁ ।
ନିଜର ଭାବି କିଛି ମାଗିଲି
ତମ ନାଆଁ ରେ ମୋ ନାଆଁ ଯୋଡିବାକୁ,
ତମେ ସଜ ହେଲ ହିସାବ ଖାତା ଧରି
ମୋ ଜୀବନ ଜ୍ୟାମିତିର ଗଣତିରେ ।
ଗଣତି ସରିଲା, କେବେ ମୋତେ
ତମର ବୋଲି କହୁଥିବା
ଗୋଲାପୀ ଓଠରୁ ଶୁଣିବାକୁ ପାଇଲି
ଅନେକ ଫରକ୍ ତମ ଆଉ ମୋ ପରିବାର ଭିତରେ ।
କାହ୍ନୁ ଚରଣ ସାହୁ
ପଣ୍ଡକାମାଳ, ମ.ରାମପୁର, କଳାହାଣ୍ଡି