ବିଦ୍ୟା
××××××××
ରବିତଳେ ବିଦ୍ୟା ସର୍ବଶ୍ରେୟଦାତ୍ରୀ
ସର୍ବାଦୌ ସେ ସମ୍ମାନୀୟା,
ବିଦ୍ୱାନ ମନୁଷ୍ୟ ବିଦ୍ୟାର ବଳରେ
ଜିଣି ପାରଇ ଦୁନିଆ ।
ବିଦ୍ୟା ଜଗତରେ ସାର,
ଜନ୍ମ ଠାରୁ ମୃତ୍ୟୁ ସାଧନା କଲେ ବି
ଅନ୍ତ ହୁଏନା ଯାହାର ।
ବିଦ୍ୟାଦାନ ଅଟେ ସର୍ବୋତ୍କୃଷ୍ଟ ସେବା
ବିଦ୍ୟାଲାଭ ଯେ ସାଧନା,
ବିଦ୍ୟାର୍ଥୀ ଜୀବନ ସୁବର୍ଣ୍ଣ ସମୟ
ସବୁ ସ୍ୱପ୍ନର ଠିକଣା ।
ଏଠାରୁ ହୁଏ ଗଣନା,
ଜୀବନର ପରିପୂର୍ଣ୍ଣତା, ସମୃଦ୍ଧି
ସାର୍ଥକତାର ପାଉଣା ।
ବିଦ୍ୟାହୀନ ଜୀବନ ଯେ ପଶୁତୁଲ୍ୟ
ମଣିଷରେ ଗଣା ନୁହେଁ,
ସୁଖତ୍ୟାଗ କରି ବିଦ୍ୟାର୍ଜ୍ଜନ କଲେ
ଜୀବନ ସାର୍ଥକ ହୁଏ ।
ବିଦ୍ୟାର ବଳେ ମଣିଷ,
ବ୍ୟାଘ୍ର, ଭଲ୍ଲୁକ ଓ ହସ୍ତୀକୁ ନଚାଏ
କରି ଅଙ୍ଗୁଳି ନିର୍ଦ୍ଦେଶ ।
ସମସ୍ତେ ହୋଇବା ଉତ୍ତମ ବିଦ୍ୟାର୍ଥୀ
ବିଦ୍ୟା ଅର୍ଜ୍ଜନ କରିବା,
ଶିକ୍ଷକଙ୍କୁ ଦେଇ ସହୃଦ ସମ୍ମାନ
ତାଙ୍କ ଆଶିଷ ଲଭିବା ।
ସମ୍ମାନ ତେବେ ପାଇବା,
ବିଦ୍ୟାଲାଭ ଅଟେ ଅମୃତ ସମାନ
ତା ପାଇଁ ପିପାସୁ ହେବା ।
ପ୍ରିୟଦର୍ଶିନୀ ମହାପାତ୍ର
ଭଞ୍ଜନଗର, ଗଞ୍ଜାମ