ବିସ୍କୁଟ
ଅଜୟ ମହାଲା
ଲଭ ବାଇଟ୍ …
କେଡେ ମପାଚୁପା ସେହି ଦାନ୍ତ ଦବେଇବା;
ସିଂହୀଟିଏ ତା ଶାବକକୁ
ଦାନ୍ତରେ ଏପଟ ସେପଟ କଲା ପରି।
ଅନ୍ଧାର ରାତିରେ ତୁମ ଦେହ ଜ୍ୟାମିତିରେ
ମୋ ଦୁଷ୍ଟାମିର ଖେଳସେମିତି ନୁହଁ କି?
ଉପର ଦାନ୍ତ ଓ ତଳ ଦାନ୍ତ ମଝିରେ ଦବାଇ
ଧୀରେ ବିସ୍କୁଟ ଭାଙ୍ଗିବା ପରି।
ତା ଭିତରେ କେବେ ତ ଶିଖାଇ ଦେଇଛ –
ଦାନ୍ତର ଶକ୍ତି ମପା ଯାଏନି ବିସ୍କୁଟଟେ ଭାଙ୍ଗିବାରେ
ଯେମିତି ପୁରୁଷପଣିଆ ମପାଯାଏନି
ଅତିଭଙ୍ଗୁର ନାରୀର ମନଟିକୁ ଭାଙ୍ଗିବାରେ
ତୁମର ଏହି ଭଙ୍ଗପ୍ରବଣତାକୁ ନେଇ ତ ଡରେ
ଏଇ ପ୍ରବାସରେ ତୁମକୁ ମନେ ପକାଇ
ଦୁଇ ଆଙ୍ଗୁଳି ଭିତରେ ସମ୍ଭାଳି ଧରେ
ଗୋଟେ ତାଜା ସକାଳର ମହକକୁ ….କିଛି ସମୟ ।
ଅଜୟ ମହାଲା
