କେମିତି ଜାଣିବି ତୁମକୁ
ମୁଁ
ତୁମକୁ ଦେବୀ ନା
ଦାନବୀ ବୋଲି
ମାନିବି ବା କେମିତି ?
କେମିତି ଜାଣିବି ତୁମର
ଐଶ୍ବରୀକ ଶକ୍ତିକୁ
ଦେବତାର ଦ୍ବାହିରେ
ଦେବତ୍ବର ଚମତ୍କାରିତାରେ
ତୁମେ କ’ଣ ଅସମ୍ଭବକୁ
ସମ୍ଭବ କରିପାରିବ
ଫେଡିଫାରିବ ଦୁଃଖୀର ଦୈନ୍ୟତାକୁ
ପୀଡନ କଷଣ ପେଷଣରେ
ଘାଣ୍ଟି ଚକଟି ହେଉଥିବା ଲୋକଟିର
ଓଠରେ ହସ ଫୁଟାଇ ପାରିବ
ମାଂସଲୋଭୀ ଦାନବକୁ
ହତ୍ୟାକରିପାରିବ ତୁମେ
ଦୁଃଷ୍କର୍ମରେ ଜଳୁଥିବା ନିରିମାଖିର
ଲୁହ ପୋଛିପାରିବ
ତୁମ ଆଶିଷସିକ୍ତ ପାଟ ପଣତରେ
କାହିଁ ମୁଁ ତ ଦେଖିପାରୁନି ତୁମକୁ
ଅନୁଭବ କରିପାରୁନି
ତୁମ ଐଶୀ ସତ୍ତାକୁ ।
ତୁମେ ରାସ୍ତାପାର୍ଶ୍ବ ଅଶ୍ବତଥ ଗଛ
ମୂଳରେ ପୂଜା ପାଉଥିବା
କାହିଁ କେଉଁକାଳର ଏକ
କଳା ଚିକ୍କଣ ମୁଗୁନି ପଥରଟେ
ପଣା ସଂକ୍ରାନ୍ତିରେ ତୁମର
ମେଳା ଲାଗେ ବଡ ଧୁମ୍ଧାମରେ।
ତମେ
ଜଣେ ମାୟାବିନୀ ବୋଲି
କାହିଁ କେତେ ଚର୍ଚ୍ଚା ହୁଏ
କାମାକ୍ଷାର କାଉଁରୀ ଅସ୍ଥିର
ଚମତ୍କାରିତା ତୁମକୁ ବେଶ୍ ଜଣା
ଗଛକୁ ଉଡାଇ ନେବାର
ଦିନରେ ମେଣ୍ଢା ହୋଇ
ବୁଲୁଥିବା ପଶୁଟି ରାତିରେ
ଭେଣ୍ଡିଆ ଯୁବକ ହୁଏ
ତୁମର କାଉଁରୀ ସ୍ପର୍ଶରେ
କାମନାର ଜ୍ଜ୍ବାଳାକୁ ପ୍ରଶମିତ କର
ତାର ବାହୁ ବନ୍ଧନରେ ।
ତୁମ ଦାନବତ୍ବର ଚର୍ଚ୍ଚା କଣ
ଏତିକିରେ କମେ
ତୁମର ମାୟାବୀ ଶକ୍ତିକୁ
ଭୟ କରନ୍ତି ସମସ୍ତେ
ନିର୍ଦ୍ଦିଷ୍ଟ ବାର ନକ୍ଷତ୍ର ଓ ତିଥିରେ
ତୁମର ପାଶବିକ ଶକ୍ତି କୁଆଡେ
ସମାଜର ହିତରେ ଲାଗେ
ଯିଏ ଯାହା ମନାସେ
ସତ୍ ଚିନ୍ତନରେ ତୁମେ
ହାତ ଟେକିଦିଅ
ଆଶିଷ ମୁଦ୍ରାରେ ପୂର୍ଣ୍ଣ ହଏ
କାମାର୍ଥୀଙ୍କ ଅଭିଳାଷ ।
ହାଏ ! ମଣିଷ କେତେ ଅସହାୟ
ପ୍ରକୃତିର ବରଦାନ ପାଇଁ
ସଭ୍ୟତାର ଦ୍ବାହିରେ ଯେତେ
ଉତ୍ତରୀତ ହେଲେ ବି
କାମନା ବାସନାର ଅନ୍ତହୀନ
ତୃଷ୍ଣାର ଉପଶମ କାହିଁ ?
––xxxx—
ସଦସ୍ୟ, ଓଡିଶା ସାହିତ୍ୟ ଏକାଡେମୀ
ମାର୍କୋଣା, ବାଲେଶ୍ବର – ୭୫୬ ୧୨୬
ଭ୍ରାମ୍ୟଭାଷ – ୯୪୩୭୩୭୨୧୬୬
ରଚନାକାଳ – ୨୮ ମେ,୨୦୨୨
ପୂର୍ବାହଣ ୯.୦୦