*ବଳାତ୍କାର ଜଞ୍ଜିର ଫିଟାଇ ହୁଅ ଅଗ୍ରସର–ରିନା ପରିଡା*

ବଳାତ୍କାର ଜଞ୍ଜିର ଫିଟାଇ ହୁଅ ଅଗ୍ରସର

ନିଶ୍ୱାସ ବି ଆଜି ପଥରୁଦ୍ଧ କରେ
ବଞ୍ଚିବାକୁ ଦୁଇ ଦିନ
କ୍ରୁର ଏ ମାନବ ଆଜି ମହୀ ତଳେ
କରାଏ ନିଜ ନାରୀ ଜାତିର ଅପମାନ |

ଆଖିର ଲୁହ ଛାତିର କୋହ
ଅବିରତ ବହିଯାଏ
ଯନ୍ତ୍ରଣାରେ ନିରୀହ ନେତ୍ର
କାନ୍ଦି କାନ୍ଦି ଥକି ଯାଏ |

ଅତ୍ୟାଚାରୀ ସେ ଦୁଷ୍କର୍ମୀ ଶୋଇଛି ମହାଆନନ୍ଦେ
କ୍ଷତାକ୍ତ କରି ନାରୀ ଶରୀର
ଚାଲୁଛି ମୁଣ୍ଡ ଟେକି ରାସ୍ତାରେ !

ଭୁଲ କରି ସେ ଦୁଷ୍କର୍ମୀ ଚାଲେ ରାଜ ରାସ୍ତାରେ
ନୀରିହା ନାରୀ ପୀଡିତା ବୋଲି
ମୁଣ୍ଡ ନୁଆଇଁ ବି ଚାଲି ନପାରେ |

ଏ କେଉଁ ସମ୍ବିଧାନ ଏଇ ମାନବ ଜାତିର
ମାନବିକତା ବି ଯାଇଛି ଶୋଇ
ଆଶା ଭରଷା ଦେବା ବଦଳରେ
ମାନବ ଦିଏ ତାକୁ ବଲାତ୍କାରୀ ସଜାଇ !

ଆଖିର ଲୁହକୁ ଅସ୍ତ୍ର କରି ଠିଆ ହୁଅ
ଛାତିର କୋହକୁ ଧୈର୍ଯ୍ୟ କରି ଆଗକୁ ବଢ଼ିଯାଅ …!
ତୁମେ ନ ଉଠିଲେ,ଆଗକୁ ନ ବଢିଲେ
ଚେଇଁ ଶୋଇଯିବ ଅତ୍ୟାଚାର
ଆତ୍ମହତ୍ୟା ତୁମେ କରିଲେ,
ଦୁଷ୍ଟ ପାଇଯିବେ ଉଦ୍ଧାର |

ହେ ନାରୀ! ତୁମେ ମହିୟସୀ କର ପାପୀଙ୍କୁ ସଂହାର
ତୁମେ ଶୋଇଗଲେ ଚୀର ଦିନ ପାଇଁ
ହେବ କି ଆଡେଇ ଦୁଷ୍କର୍ମ ବ୍ୟଭିଚାର ?

ଜାଗ୍ରତ ହୁଅ ଜାଗ୍ରତ ହୁଅ
ହେ ନାରୀ ସମାଜ !
ପ୍ରତିଜ୍ଞା କର ଦୁଷ୍କର୍ମ ଆଡେଇ
ଝାନସୀ ରାଣୀ ହୋଇ ଲଢ଼ିବ ଆଜ |

ଶୁଣନାହିଁ ବାରେ ଇତର ବ୍ୟକ୍ତିର ଛି ଛାକର
ସଜାଗ ହୁଅ ସଜାଗ ହୁଅ
ନିଜ ପାଇଁ ନିଜେ ଲଢ଼
ବେତ୍ରାଘାତ କରି ଚେଇଁ ଶୋଇଥିବା,
ମାନସିକତାକୁ ଉଠାଇ ଦିଅ !

ହେ ନାରୀ ସମାଜ ! ଜାଗ୍ରତ ହୁଅ
ବଳାତ୍କାର ଜଞ୍ଜିର ଫିଟାଇ ଦେହରୁ
ନ୍ୟାୟ ପାଇଁ ଅଗ୍ରସର ହୁଅ !

~~~~ସମାପ୍ତ ~~~~~

ରିନା ପରିଡା, ଜିଲ୍ଲା -ଖୋର୍ଦ୍ଧା