ଶରତ

ବରଷା ବିଗତ ଶରତ ଆଗତ

ବିମଳ ଧରିତ୍ରୀ ସୁନ୍ଦର ଶୋଭିତ !

ରୁଚିର କାଇଁଶ କୁସୁମ ଶୋଭନ

ଧରଣୀ ମଥାର ମୁକୁଟ ମଣ୍ଡନ !

ବିଦାୟ ଘୋଷିତ ବାର୍ଦ୍ଧକ୍ୟ ସଙ୍କେତ

ଶୁଭ୍ରକେଶୀ ବର୍ଷା ନେତ୍ରେ ପ୍ରତିଭାତ !

ଉଦୟ ଅଗସ୍ତି ବିମଳ ଗଗନେ

ଶୁଷ୍କ ପଥ ଜଳ ସନ୍ତୋଷ ଯେସନେ !

ସରିତ ସରସୀ ନିର୍ମଳ ସଳିଳ

ବିଦେହ ସାଧୁର ଯେନ୍ହେ ହୃଦ ସ୍ଥଳ !

ବୋଇତ ପ୍ରାୟେକ ଧଳା ମେଘ ମାଳ

ଭାସନ୍ତି ଅମ୍ବରେ ହୋଇ ଦଳ ଦଳ !

ସତେକି ଆକାଶ ବିଜୟ ଘୋଷିତ

ଧବଳ କୁସୁମ ହାର ବିମଣ୍ଡିତ !

ଶରତ ଆଗତ ଚକୋର ତୃଷିତ

ବିରହ ପ୍ରାଣର କଷଇ ଗଣିତ !

ହୋଇ ଦଳ ଦଳ ଭ୍ରମନ୍ତି ଖଞ୍ଜନ

ସମୟ ଆସନ୍ତେ ସୁକୃତ ଯେସନ !

ଧୀର ମୃଦୁଗାନ ବିରଚେ ପବନ

ହରିବା ନିମନ୍ତେ କୃଷକ କଷଣ !

ଵିହସେ ନଳିନି ନଳିନୀ ବିକଶେ

ହରଷେ ଅନ୍ତର ଅରୁଣ ଦରଶେ !

ମଧୁରେ ମଧୂପ ଗୁଞ୍ଜଇ କୀର୍ତ୍ତନ

ସାରଦା ମାତାର କରେ ଆବାହନ !

ମରାଳ ମାଳିନୀ ସହଚରୀ ଘେନି

ସାନନ୍ଦେ ନୃତ୍ୟନ୍ତି ସରୋବର ପାଣି !

ନିର୍ମଳ ଆକାଶେ କୁସୁମ ସୁବାସେ

କୁମୁଦ ପ୍ରାଣର ବେଦନା ବିନାଶେ !

ବନ ଉପବନ ସୁମନ ସମ୍ପନ୍ନ

ମଧୁର ମହକେ ହରେ ଜନ ମନ !

ଗହଳ ଶ୍ୟାମଳ ପାଦପ ପୂରିତ

ଆହାକି ସୁନ୍ଦର ବନାନୀ ପର୍ବତ !

ଫସଲ ହରିତ କିଆରୀ ମଣ୍ଡିତ

ବସୁଧା ରାଣୀର ବସନ ଶୋଭିତ !

ଦୁଃଖିତ କୃଷକ ହୃଦୟ ପ୍ରସନ୍ନ

ଶରତ ସଖାର ଲଭି ଆଶ୍ୱାସନ !

ନୂତନ ବିହନ ଅମଳ କରିଣ

ପୂଜେ ଦେବାଦେବୀ ନବାନ୍ନ ପାଳିଣ !

ଏକତାରେ ବାନ୍ଧି ପରାପର ତେଜି

ବିଶ୍ୱକୁ ପାଳଇ ଶାନ୍ତିଦୂତ ସାଜି !


କୌସ୍ତୁଭ ଜାଲ, ଡୁଡୁକା, ବଲାଙ୍ଗୀର

Leave a Reply

Your email address will not be published. Required fields are marked *