-:ସେବିକା :-
**********
ସୁନ୍ଦର ଏକ ଅପରାହ୍ନ ର ସୂର୍ଯ୍ୟାସ୍ତ କୁ ଉପଭୋଗ କରୁଥାଏ ମୁଁ | ଅଚିରାତ କର୍ଣ୍ଣ ପଟ୍ଟ କୁ ସ୍ପର୍ଶ କରିଲା ମୋ ମା ର ସ୍ନେହଭରା ଡାକ -“ଆରେ ମା ‘ଲକ୍ଷ୍ମୀ ର ଫୋନ ଆସିଛି |” ‘ଲଷ୍ମୀ ‘ମୋ ସାନ ମାଉସୀ ଙ୍କ ଝିଅ, ସ୍ୱାସ୍ଥ୍ୟକର୍ମୀ ଭାବେ ରାଜଧାନୀର ଏକ ସ୍ୱାସ୍ଥ୍ୟ କେନ୍ଦ୍ର ରେ କାର୍ଯ୍ୟରତ | ସବୁ ଭଉଣୀ ଙ୍କ ମଧ୍ୟରୁ ସେ ଟିକେ ନିଆରା, ଖୁବ ସାହସୀ, ଧୈର୍ଯ୍ୟବାନ, ସଚ୍ଚୋଟ ବହୁ ଭଲ ଗୁଣ ର ଅଧିକାର, ଓଡ଼ିଆ ରେ ଗୋଟେ କଥା ନାହିଁ -“ଝିଅ ଟି ସର୍ବ ଗୁଣ ସମ୍ପର୍ଣ୍ଣା ” ଠିକ ସେହିଭଳି |
ମୁଁ କଥା ହେଲି, ବାର୍ତ୍ତାଳାପ ମଧ୍ୟରେ ସେ କହିଲା -“ଦିଦି, ମୋ ମନ କାହିଁ ଭଲ ନାହିଁ|” ଅସୁସ୍ଥ ମନ ର କାରଣ ପଚାରିବାରୁ କହିଲା -“ଜାଣିନି, କାହିଁକି ଭଲ ଲାଗୁନି ମୋତେ କିଛି |” ତାପରେ କିଛି ଅଶ୍ଵସ୍ତିପୂର୍ଣ୍ଣ ଉକ୍ତି କହିବାକୁ ଯାଇ କହିଲି -“ତୁ ଯାହା ଏବେ ଅନୁଭବ କରୁଛୁ, ଗୋଟେ ଖାତା ରେ ଲେଖିଦେ | ଖରାପ ଅନୁଭବ ମନ କୁ ଅସୁସ୍ଥ କରିଥାଏ | ସେ ଅନୁଭବ କୁ ମନ ରୁ ଲେଖା କିମ୍ବା ବାଚ୍ୟ ମାଧ୍ୟମ ରେ ବାହାର କରି ଦେବା ଉଚିତ | ”
ଏତିକି ଶୁଣି ନିଜ ବେଦନାକୁ ନିଜ ମଧ୍ୟେ ରଖି ଦେଇ କହିଲା -“ଦିଦି, ଚାଲ ସିଲୁ ସହ କଥା ହେବା | ‘ସିଲୁ ‘ମୋ ବଡ ମାଉସୀ ଙ୍କର ବଡ଼ ଝିଅ, ଆଉ ସବୁଠୁ ସାନ ଭଉଣୀ ମୋ ଲୁସି, ଖୁବ ଅଲିଅଳି କଇଁ ପରି ସେ | ସିଲୁ ମଧ୍ୟ ଏବେ ରାଜଧାନୀର ଅନ୍ୟ ଏକ ସ୍ୱାସ୍ଥ୍ୟ କେନ୍ଦ୍ର ରେ ସ୍ୱାସ୍ଥ୍ୟକର୍ମୀ ଭାବେ କାର୍ଯ୍ୟରତ | ମୁଁ, ଲକ୍ଷ୍ମୀ, ସିଲୁ ଆମ ତିନି ଭଉଣୀ ଙ୍କର ସାମୁହିକ କଥାବାର୍ତ୍ତା ଚାଲିଥାଏ | ସେ ସମୟ ରେ COVID-19 ର ପ୍ରଭାବ ରେ ସାରା ବିଶ୍ୱ ପ୍ରଭାବିତ |
ସମୟ ର ପରିସ୍ଥିତି କୁ ଆଖି ଆଗରେ ରଖି , ଏକ ଉକ୍ତି ଉପସ୍ଥାପନା କରି କହିଲି -“COVID -19 ର ଚିକିତ୍ସା ପାଇଁ ତୁମେ ଦୁହେଁ କାର୍ଯ୍ୟରତ ଥିବା ଦୁଇଟି ଯାକ ଚିକିତ୍ସାଳୟ ରେ ବନ୍ଦୋବସ୍ତ କରାଯାଉଥିବାର ଖବର ପ୍ରସାରଣ ହୋଇଛି |ସେ ବିଷୟରେ କଣ ତୁମ ଅନୁଭୂତି କୁହ | ସେ ଦୁହେଁ ନିଜର ମତ ପ୍ରକାଶ କରିବାକୁ ଯାଇ କହିଲେ -” ହଁ ଦିଦି, ଆମ ଦୁହିଁ ଙ୍କ ଚିକିତ୍ସାଳୟ ରେ COVID-19 ର ଚିକିତ୍ସା ନିମନ୍ତେ ଆୟୋଜନ ଚାଲିଛି | ଆମକୁ ସେ ରୋଗ ରେ ପୀଡିତ ପୀଡିତା ଙ୍କର ଚିକିତ୍ସା ପାଇଁ ସ୍ୱତନ୍ତ୍ର ତାଲିମ୍ ଦିଆଯାଉଛି |ଆମେ ଦୁହେଁ ଏ ଜଟିଳ ପରିସ୍ଥିତି ସହ ମୁକାବିଲା କରିବା ପାଇଁ ନିଜକୁ ପ୍ରସ୍ତୁତ କରୁଛୁ | ଆମ କର୍ତ୍ତବ୍ୟ ଆମେ ସୁଚାରୁରୂପେ ସମ୍ପାଦନା କରିବାକୁ ପ୍ରଚେଷ୍ଟା କରିବୁ | ଆମ ଦେଶ ର ଏ ସଂଘିନ ସ୍ଥିତି ରେ ନିଜର ତାଲିମ୍ଗତ ଯୋଗ୍ୟତା ଓ ଦେଶ ସେବା ର ଏକ ମନୋବଳ ନେଇ ଆପ୍ରାଣ ଉଦ୍ୟମ କରିବାକୁ ନିଜକୁ ପ୍ରସ୍ତୁତ କରୁଛୁ |ଇଶ୍ୱର, ବାପା ମାଆ, ବନ୍ଧୁ ପରିଜନ ଆମକୁ ଏ ଜନହିତକର କାର୍ଯ୍ୟ ରେ ନିୟୋଜିତ କରେଇଥିବାରୁ ଆମେ ତାଙ୍କ ନିକଟରେ ଚିର ଋଣୀ ଆଉ ଧନ୍ୟବାଦ ଜ୍ଞାପନ କରୁଛୁ |”
ଏହି ସବୁ ଆଲୋଚନା ଶେଷରେ ଆମେ ଫୋନ ରଖିଲୁ | ଦୁହିଁ ଙ୍କର ଏହିପରି ଉତ୍ସର୍ଗୀକୃତ ଉକ୍ତି ଶୁଣି କିଛି ମୁହୂର୍ତ ମୁଁ ଭାବ ବିହ୍ଵଳ ହୋଇ ବସି ପଡିଥାଏ ଓ ଭାବୁଥାଏ ସମସ୍ତ ସ୍ୱାସ୍ଥ୍ୟକର୍ମୀ ଙ୍କ ଧୌର୍ଯ୍ୟଶୀଳ ଶକ୍ତି କୁ | ସେହି ସମୟ ରେ ଦୂରଦର୍ଶନ ରେ ଏକ କାର୍ଯ୍ୟକ୍ରମ ପ୍ରସାରଣ ହେଉଥାଏ ‘ମନ କି ବାତ ‘ ସେଥିରେ ଆମ ଦେଶ ର ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ଦାମୋଦର ଦାସ ମୋଦି, ଜଣେ COVID-19 ରୁ ମୁକ୍ତ ହୋଇଥିବା ବ୍ୟକ୍ତି ର ଅନୁଭୂତି ପଚାରୁ ଥାନ୍ତି | ବ୍ୟକ୍ତି ଜଣକ ନିଜ ଅନୁଭୂତି ଉପସ୍ଥାପନା କରିବାକୁ ଯାଇ କହିଲେ -“ଆଜ୍ଞା, ଖୁବ ଭୟଭୀତ, ଧୈର୍ଯ୍ୟହରା ଥିଲା ମୋ ମୁହୂର୍ତ | କିନ୍ତୁ ମୋ ଚିକିତ୍ସାରତ ଥିବା ସ୍ୱାସ୍ଥ୍ୟକର୍ମୀ ଙ୍କ ଯେଉଁ ଆଶ୍ୱାସନା ପୂର୍ଣ୍ଣ, ସକାରାତ୍ମକ, ଧୈର୍ଯ୍ୟଶୀଳ ଉକ୍ତି ଏବଂ ଯତ୍ନଶୀଳ ସେବା ହିଁ ମୋତେ ଆରୋଗ୍ୟ କରିପାରିଛି | ସେଥିପାଇଁ ମୁଁ ସେମାନଙ୍କ ନିକଟେ କୃତଜ୍ଞ |”
ସେ ଦୁଇଟି ମୁହୂର୍ତ ର ପ୍ରଭାବ ମୋ ହୃଦୟର କୋଣାନୁକୋଣ କୁ ସ୍ପର୍ଶ କରିଗଲା | ବିଶ୍ୱ ର ସମସ୍ତ ସ୍ୱାସ୍ଥ୍ୟକର୍ମୀ ଙ୍କ ନିକଟେ ଆଜି ଆମ ସମାଜ ଚିରଋଣୀ | ଜନ୍ମଦାତ୍ରୀ ତ ମା କିନ୍ତୁ ଜୀବନ ର ଦ୍ୱିତୀୟ ଜୀବନଦାତ୍ରୀ ସେ | ସତରେ କେତେ ସମର୍ପଣ ମନୋଭାବ ର ଅଧିକାରୀ ସେମାନେ | ମାନବିକତା ର ଜ୍ୱଳନ୍ତ ପ୍ରତିମା | ଖୁବ ସଂଘର୍ଷମୟ ଜୀବନ ତାଙ୍କର | ପ୍ରତି ମୁହୂର୍ତ୍ତ ରେ ଜୀବନ ମୃତ୍ୟୁ ର କଷ୍ଟ କୁ ମର୍ମେ ମର୍ମେ ଅନୁଭବ କରିପାରୁଥିବା ଏ ସୃଷ୍ଟି ର ସର୍ବ ଶ୍ରେଷ୍ଠ ଜନ ସେବା ବୃତ୍ତି ରେ କାର୍ଯ୍ୟରତ ସେମାନେ | କେତେ କେତେ ଜୀବନ ତାଙ୍କରି ହାତରେ ପ୍ରଥମ ପାଦ ଦେଇ ଦୁନିଆ କୁ ଆସନ୍ତି ତ କେତେ ପୁଣି ତାଙ୍କ ଚକ୍ଷୁ ଆଢୁଆଳୁ ବିଦାୟ ନିଅନ୍ତି ଏ ଦୁନିଆରୁ |କେତେ ଘାତ ପ୍ରତିଘାତ ର କ୍ଷତ ରୁ ଲୋକ ଙ୍କୁ ଭଲ କରିଥାନ୍ତି ତ ନିଜେ ମଧ୍ୟ ବହୁ କ୍ଷତ ରେ କ୍ଷତାକ୍ତ ହୋଇଥାନ୍ତି | ଦୁଃଖୀ ସୁଖୀ, ଦୀନହୀନ, ଧନୀ ଗରିବ, ଛୋଟ ବଡ଼ ସମସ୍ତେ ତାଙ୍କ ଦୃଷ୍ଟି ରେ ଏକ ସମାନ ସ୍ଥାନ ଅଧିକାର କରିଥାନ୍ତି | ଅଧୈର୍ଯ୍ୟ ମୁହୂର୍ତ ରେ ତାଙ୍କ ଆଶ୍ୱାସନାଭରା ଉକ୍ତି ହୃଦୟ କୁ ଶାନ୍ତ କରିଥାଏ | ସର୍ବଦା ତାଙ୍କର କଠୋର ପ୍ରଚେଷ୍ଟା ଥାଏ ସମସ୍ତ ଙ୍କ ଓଠ ରେ ଏକ ସୁସ୍ଥ ହସ ଫୁଟାଇବାର | ଆମ ଜୀବନ ର ମୂଲ୍ୟ କୁ ନିଜ ଦୃଢ଼ତା ବଳ ରେ ସେ ଅମୁଲ୍ୟ କରିବାର କ୍ଷମତା ରଖିଥାନ୍ତି | ଜୀବନ ର ସୁଖ ସ୍ୱଚ୍ଛନ୍ଦ କୁ ଆଡେଇ ଦେଇ ଚାଲିଯାନ୍ତି ସେ ଲୋକ ଙ୍କ ସେବା କରିବାର ମନୋବୃତ୍ତି ନେଇ |
ସତରେ ଆଜି ମୁଁ ବହୁତ ଖୁସି ଏକ ସ୍ୱାସ୍ଥ୍ୟକର୍ମୀ ପରିବାର ର ସଦସ୍ୟ ହୋଇ | ଆଜି ସେ ଦୁହିଁ ଙ୍କର ଯେଉଁ ଭାବପୂର୍ଣ୍ଣ ଆଳାପ, ଉତ୍ସର୍ଗୀକକୃତ ମନୋଭାବ, ସାହାସିକତା, ଧୈର୍ଯ୍ୟ, ନିର୍ଭୀକତା, ସେବା କରିବାର ଯେଉଁ ଉଦବେଗ ମୋତେ ଆଶ୍ଚର୍ଯ୍ୟ କରିଦେଉଛି |
ଶେଷରେ ଏତିକି କହିବି, ମୋ କୁନି ଗୋଲାପ କଢି ଦୁଇଟି ଆଜି ସମ୍ପୂର୍ଣ ଭାବେ ନିଜ ସୁନ୍ଦର ନାଲି ରଙ୍ଗ ର ସୁସ୍ଥ ପାଖୁଡା ସବୁକୁ ସଂପ୍ରସାରିତ କରି ଫୁଟି ଉଠିଲେଣି | ନିଜର ସୁନ୍ଦରତା କୁ ପ୍ରାଧାନ୍ୟ ନଦେଇ ଅନ୍ୟ କୁ ସଜେଇବାର ଖୁସି କୁ ସେ ଅନୁଭବ କରି ଲେଣି | ଅନ୍ୟ ର ଖୁସି ରେ ସେ ନିଜର ଖୁସି କୁ ପାଇଯିବାର ପ୍ରଣାଳୀ ରେ ନିଜକୁ ସଜେଇ ଦେଲେଣି |
” ଲୁସି – କର୍ମ ହିଁ ଭଗବାନ ”
“ସିଲୁ – ଜୀବନ ସଂଘର୍ଷମୟ ”
“ଲକ୍ଷ୍ମୀ – ସମସ୍ତ ପରିସ୍ଥିତି କୁ ଧୈର୍ଯ୍ୟ ସହକାରେ ସମ୍ମୁଖୀନ କରିବା ”
“ସୁଭଦ୍ରା – ନୀରବତା ସବୁ ଅଲୋଡ଼ା ମୁହୂର୍ତ କୁ ସଜାଇ ପାରିବ”ସୁଭଦ୍ରା ସିଂହ
ଆନନ୍ଦପୁର ,କେନ୍ଦୁଝର
Subhadra Singh
Anandapur, Keonjhar