ପ୍ରତୀକ୍ଷାର ତୀରେ
ପ୍ରତୀକ୍ଷାର ତୀରେ
ତୃଷିତ ଅନ୍ତରେ
ହୃଦୟର ପାରାବାରେ,
ଜଳୁଥାଏ ନିତି
ଅନ୍ତର ଦୀପାଳି
ପ୍ରଣୟର ଜ୍ୟୋତି ଧାରେ l
ବେଦନାର ସ୍ପର୍ଶ
କରେ ଉଦ୍ଜୀବିତ
ବାସ୍ନାୟିତ ସ୍ମୁତିରାଜ୍ୟ,
ପ୍ରୀତି ସମ୍ମୋହନେ
ନିମଗ୍ନ ନିଶ୍ଚଳ
କଳ୍ପନା ଭାବ ସାମ୍ରାଜ୍ୟ l
ଭୂମିଠାରୁ ଭୂମା
ପ୍ରଣୟ ନୀଳିମା
ସ୍ନିଗ୍ଧ ଅନୁଭବ ଜାଗେ,
ଦଗ୍ଧଭୂତ ସ୍ମୃତି
ଜ୍ୟୋତ୍ସ୍ନା ଭିଜା ଗୀତି
ପ୍ରୀତିର କସ୍ତୁରୀ ରାଗେ l
ମେଘ ପଟୁଆରେ
ଆକାଶ ବୁକୁରେ
ଆଙ୍କେ କାହା ରୂପକାନ୍ତି,
ଦୂରେ ବହୁଦୂରେ
ପ୍ରୀତି ଅଭିସାରେ
ଜ୍ୱଳନ୍ତ ପ୍ରଣୟ ଜ୍ୟୋତି l
ସ୍ମୃତିକୁ ସାଉଁଟି
ପ୍ରୀତିକୁ ଆଉଟି
ଅନୁରାଗ ହୃଦେ ଭରି,
ବିଦଗ୍ଧ ହୃଦୟ
ଗୋପନ କନ୍ଦରୁ
ବ୍ୟଥା ପଡୁଥିବ ଝରି l
ସୁଜାତା ଦାସ
ବାଲେଶ୍ୱର
