ମଣିଷ ଜୀବନ
************
ମଣିଷ ଜୀବନ ପାଣି ଫୋଟକାଟେ
କେତେବେଳେ ଅବା ଫାଟିଯିବ
କେହି ଜାଣିନାହିଁ ଜାଣି ପାରିବେନି
କେତେବେଳେ ବେଳ ଆସିଯିବ ।।
ଜୀବନ ମାତ୍ରକେ ମରଣ ରହିଛି
ମର୍ତ୍ତ ମଣ୍ଡଳରେ ଦେହ ଧରି
କେହି ବର୍ତ୍ତୀ ନାହିଁ ମରଣ ମୁହଁରୁ
ଜଣ ଜଣ କରି ଯାନ୍ତି ଚାଲି ।।
ବଡ଼ ସାନ କିଛି ମାନେ ରଖେ ନାହିଁ
ଧନୀ ଗରୀବର ପାଚେରୀ
ଲାଞ୍ଚ କିମ୍ବା ଖୋଷାମତି କାମ ନାହିଁ
ସମସ୍ତଙ୍କୁ ନେବ ଘୋଷାରି ।।
ଆଶ୍ଚର୍ଯ୍ୟର କଥା ମରଣ ସମୟ
କେହି କେବେ ଜାଣି ନାହାଁନ୍ତି
ଆଜି କିମ୍ବା କାଲି ଯା ପାଳି ପଡ଼ିବ
ଦେହ ଛାଡି ଚାଲି ଯାଆନ୍ତି ।।
ଜୀବନ ଯନ୍ତ୍ରଣା ସହିବାକୁ ହୁଏ
ଉଚ୍ଚ ନୀଚ୍ଚ ପଥ ଦେଇଣ
ସୁଖ ଓ ଦୁଃଖକୁ ଆପଣାର କରି
ଚାଲିବାଟା ପରା ଜୀବନ ।।
ଜୀବନ ଜଞ୍ଜାଳ ମଧ୍ୟରେ କଟଇ
ପରିବାର ନେଇ ସାଥୀରେ
ରୋଗ ଯନ୍ତ୍ରଣାକୁ ସାଂଗ କରି ସାଥେ
ବିତାଏ ସମୟ ଭବରେ ।।
ବିଭିନ୍ନ ପ୍ରକାର ଅଭିନୟ କରି
ବିତାନ୍ତି ମଣିଷ ଜୀବନ
କିଏ ଚୋର କିଏ ସାଧୁ ବୋଲାବନ୍ତି
ନିଜର କର୍ତ୍ତବ୍ୟ କରିଣ ।।
କିଏ ପର ତଣ୍ଟି ଚିପି ଆଣେ ଧନ
କିଏ ଚାଲେ ସତ୍ୟ ଧାରରେ
କିଏ ଈଶ୍ବରଙ୍କ ପାଦେ ଧ୍ୟାନ ରଖି
ଯୋଗ ତପସ୍ୟା ଏ ମହିରେ।।
କେ କରେ ବାଣିଜ୍ୟ କେ ଚଳାଏ ରାଜ୍ୟ
କିଏ ସରକାରି ଚାକିରୀ
କାହାକୁ ନ ମିଳେ ଦାନା ଦୁଇ ମୁଠା
କରେ ଥାଏଟି ଭିକ୍ଷା ଗିରି ।।
ଏହିପରି ଭାବେ ଜୀବନ ଚଳଇ
ତାହାର ଗନ୍ତବ୍ୟ ପଥରେ
ମରଣଟି କିନ୍ତୁ ଦିନ ଗଣୁଥାଏ
କା ପାଳି ପଡ଼ିବ କେ ବେଳେ ।।
ଛୋଟ ଛୁଆ ହେଉ କିମ୍ବା ବୁଢ଼ା ହେଉ
ସମୟ ତ ନିଶ୍ଚେ ଆସିବ
ଜନମ ରହିଛି ମରଣ ନିଶ୍ଚିତ
ଅକସ୍ମାତେ କାମ କରିବ ।।
ଖବର ଅନ୍ତର କିଛି ନାହିଁ ତା’ର
କରିବନି ଅବା ଫୋନ୍
ବାଘ ପରି ସେହୁ ଛକି ବସିଥିବ
ଘେନିଯିବ ପରା ପରାଣ ?
ଧନ୍ୟ ହେ ଈଶ୍ବର ଧନ୍ୟ ତୁମ ସୃଷ୍ଟି
ଲଗାଇଛ ପ୍ରଭୁ ଏହି ଲୀଳା
ମର୍ତ୍ତ୍ୟକୁ ପେଷୁଛ ଘୋଷାରି ନେଉଛ
ଭାଙ୍ଗି ଦେଉଅଛ ଭବ ଭେଳା ।।
ହେମନ୍ତ କୁମାର ସାହୁ।
ମାହାଙ୍ଗା।
