ମନ ରହିଯାଏ ଲାଖି
ଈଶ୍ୱରଙ୍କ ସୃଷ୍ଟି
କେତେ ଯେ ବିଚିତ୍ର
ତାହାର କଳନା ନାହିଁ
ଯେତେ ଦେଖୁଥିଲେ
ସେ ରୂପ ମାଧୁରୀ
ମନ ଜମା ପୁରେ ନାହିଁ l
କେତେ କଣ ସବୁ
ସୃଷ୍ଟି କରିଛନ୍ତି
ଏ ସାରା ସଂସାର ପାଇଁ
ଗଢିଛନ୍ତି ପୁଣି
କେତେ ନଈ, ନାଳ
ଆମରି ସୁବିଧା ପାଇଁ l
ମଣିଷ ବୁଦ୍ଧିକୁ
ଲାଗଇ କାମରେ
ଗଢିଲା ଗାଆଁ ସହର
ଗାଆଁରେ ରହିଛି
ଛୋଟ ଚାଲଘର
ତା’ ପାଖେ ଶିବ ମନ୍ଦିର l
ରାସ୍ତା ଦୁଇପାଖେ
ବାଉଁଶର ତାଟି
କିଣଇ ସଭିଙ୍କ ମନ
ନାଉରିଆ ଭାଇ
ନାଆ ବହିନିଏ
ମଙ୍ଗକୁ ହାତେ ଧରିଣ l
ଛୋଟ ଛୋଟ ପିଲା
ଖୁସି ହେଉଥାନ୍ତି
ପାଣିର ଆହୁଲା ଦେଖି
ଧାନ କ୍ଷେତ ସବୁ
ସୁନ୍ଦର ଦିଶଇ
ମନ ରହିଯାଏ ଲାଖି l
ଧନ୍ୟ ତୁମେ ସେହି
ସୃଷ୍ଟିର ନାୟକ
ଧନ୍ୟ ତୁମ ଗଢ଼ା ହାତ
ଦୂରରୁ ଥାଇ ମୁଁ
ଅଦୃଶ୍ୟ ସ୍ରଷ୍ଟାଙ୍କୁ
କରୁଅଛି ପ୍ରଣିପାତ l
ବ୍ରଜେଶ୍ବରୀ ସିଂହ
ଯାଜପୁର ରୋଡ, ଯାଜପୁର
