ଖାଣ୍ଟି କଟକିଆ
କଟକ ନଗର ଧବଳ ଟଗର
ପ୍ରାଣବିନ୍ଦୁ ଯହିଁ ଗଢିହେଲା ମୋର।
ପୁରାତନ ରାଜଧାନୀ ବୋଲି ଟେକ
ଅଭିନବ ବାରାଣାସୀ ସେ କଟକ।
ଓଡିଶାର ଶେଷ ସ୍ୱାଧୀନ ନୃପତ୍ତି
କଳା ପାହାଡ ଯା ଆଣିଲେ ବିପତ୍ତି।
ମାତା ଗଡଚଣ୍ଡୀ ଗଡଗଡେଶ୍ୱର
କଟକ ଚଣ୍ଡୀଙ୍କ ମହିମା ଅପାର ।
କଟକର ଚିନ୍ତା ବାଇମୁଣ୍ଡି କରି
ସମର୍ପିଲା ମୁଦ୍ରା ମର୍କତ କେଶରୀ।
ନବ୍ୟ ଭବ୍ଯ ସେହି ରିଂ ରୋଡ ଆଜି
ବଢାଏ କଟକ ସଉଧ ସମୃଦ୍ଧି ।
ବାରବାଟୀ ଠାରେ ମହାନଦୀ ଘାଟ
ବିଶ୍ୱ ପ୍ରସିଦ୍ଧ ଯା ବାଲିଯାତ୍ରା ଥାଟ ।
ବିଡାନାସୀ ଠାରୁ ବିଦ୍ୟାଧରପୁର
ଯୋବ୍ରା ଆନିକଟରୁ ଖାନ ନଗର।
କଲେଜିଏଟ୍ ସ୍କୁଲ ରେଭେନ୍ସା କଲେଜ
ସୟେଦ ସେମିନାରୀ କ୍ରାଏଷ୍ଟ କଲେଜ ।
ଶୈଳବାଳା ଜେକେବିକେ ସେକେଣ୍ଡାରୀ
ବୋର୍ଡ ସ୍କୁଲ ଗଢେ ପ୍ରତିଭା ଆହୁରି ।
ଓଡିଶାର ଯିଏ ଜଣକରେ ଗଣା
ରେଭେନସାଭିଆନ୍ ହୋଇଥିବ ଜଣା ।
ବଡ ମେଡିକାଲ ନିଦାନ ଠିକଣା
ସ୍ୱାସ୍ଥ୍ୟ ସେବା ସରଗରେ ଯାହା ଗଣା।
ଚାନ୍ଦନିଚୌକ ଶିଶୁଙ୍କ ଭବନ
ଶୈଶବର ରୋଗ କରଇ ନିଦାନ ।
ଗୋରା କବରରେ ମଧୁ ବାରିଷ୍ଟର
ନାଲିକୋଠା ଯା’ରେ ମାରେ ଆଖିଠାର।
କାଠଯୋଡି ପଠା ଗାନ୍ଧୀଙ୍କ ଭାଷଣ
ଗୋପବନ୍ଧୁ କରିଥିଲେ ଆମନ୍ତ୍ରଣ ।
ଗୋପାଳ ପ୍ରହରାଜ ଭାଷାକୋଷ ଲେନ
ଦେବୀଗଡା ଯହିଁ ଦଶରା ଭଷାଣ ।
ଆକାଶ ବାଣୀର ପ୍ରତିଭା ତିଆରି
ଅନ୍ନପୂର୍ଣ୍ଣା ଥିଏଟର ପଡେ ଭାରି।
କବି ଚନ୍ଦ୍ର ସେ କାଳୀ ପଟ୍ଟନାୟକ
ଖୋକା ଭାଇ କଲେ ଅକ୍ଷୟ କଟକ।
ରିଂରୋଡ ଉପରେ ନଦୀବଢି ଦୃଶ୍ୟ
ଗୁପଚୁପ ଚାଟ ସାଂଗରେ ଅବଶ୍ୟ ।
ମାଲଗୋଦାମର ହୋଲସେଲ୍ ଦରବ
ଛତର ବଜାରେ ଷଣ୍ଢ ଉପଦ୍ରବ ।
ଗୌରୀଶଙ୍କର୍ ପାର୍କ୍ କାଳିଆର ଚାଟ
ନନା ହୋଟେଲ ଅରୁଆ ଦିବ୍ୟ ଘାଂଟ ।
ରାଣୀହାଟ ପୋଲ ଚକୁଳି ଘୁଗୁନି
ଦୋଳମୁଣ୍ଡେଇର ଥଣ୍ଡା ଲସି ପୁଣି ।
ଦେବୀ ଦୁର୍ଗା ଗ୍ରାଣ୍ଡ ରାଜତରଂଗିଣି
ସମ୍ରାଟ ସଂଗମ ମନ ନିଏ କିଣି ।
ବାଦାମ ବାଡିର କେଁଏକାଁ ଭେଁଏଭାଁ
ରେଳ ଷ୍ଟେସନରେ ମନେ ପଡେ ଗାଆଁ।
ତାରକସି କାମ ପ୍ରସିଦ୍ଧ ବିଶ୍ୱର
ସାଂସ୍କୃତିକ ପ୍ରାଣକେନ୍ଦ୍ର ଓଡିଶାର ।
ଦଶହରା ଚାନ୍ଦିମେଢ ସାହି ସାହି
କଟକକୁ ମନୁ ଭୁଲିବକି କେହି !
ଭାଇଚାରା ଯହିଁ ଏକତା ସାହିର
ଖାଣ୍ଟି କଟକିଆ ଚୌଡା ଛାତି ତା’ର।
ସାରା ରାଇଜର ବଡ ଭାଇ ପଣ
କଟକିଆ କେତେ ଦେବ ବା ପ୍ରମାଣ !
@ଚନ୍ଦ୍ରଶେଖରପୁର, ଭୁବନେଶ୍ବର।