ଈଶ୍ୱରଙ୍କୁ ପ୍ରଶ୍ନ
**************
ତୁମ ସାଥେ ଯଦି କେବେ ହୁଏ ଦେଖା
ତୁମକୁ ମୁଁ ପଚାରିବି,
ଏମିତି କାଇଁ ମୋ ଜୀବନକୁ କଲ
ମୋତେ ଥରେ କୁହ ଭାବି।
ସପନ ନୟନେ ବାରମ୍ବାର ଆସେ
ତା’ଠାରୁ ମୁଁ ରହେ ଦୂରେ,
ବାସ୍ତବତା ଜାଳେ ହୃଦୟକୁ ମୋର
ଦାରିଦ୍ର୍ୟର ତାଡ଼ନାରେ।
ମନେ ଯେବେ ପର ଲାଗେ ଉଡ଼ିବାକୁ
ଇଚ୍ଛାକୁ କରେ ବନ୍ଦିନୀ,
ଯୌବନ ଜ୍ୱାଳାକୁ ଦେଇ ଜଳାଞ୍ଜଳି
ସାଜଇ ମୁଁ ତପସ୍ୱିନୀ।
ଦାମ୍ପତ୍ୟ ଜୀବନମୋ ପାଇଁ ମହଙ୍ଗା
ଦୁନିଆ ବଜାରେ ହେଲା,
ସନ୍ତାନ ସୁଖରୁ ଦୂରେ ମୁଁ ରହିଲି
ଅର୍ଥାଭାବେ ଲାଗେ ପାଲା।
ଦିବା ସ୍ବପ୍ନ ଦେଖେ କତରାରେ ପଡ଼ି
ପୀଡ଼ିତ ରୋଗ ଶଯ୍ୟାରେ,
ସପରିବାର ମୋତେ ଆବୋରିଛନ୍ତି
ମରଣ ଶଯ୍ୟା ପାର୍ଶ୍ଵରେ।
ତୁଣ୍ଡେ ଗାଉଛନ୍ତି ଗୀତା ଭାଗବତ
ନିର୍ମାଲ୍ୟ ମୋର ତୁଣ୍ଡରେ,
ଆଖି ମେଲି ଯେବେ ନିଜକୁ ଦେଖିଲି
କେହି ନାହିଁ ମୋ ପାଖରେ।
ବିନା ଅପରାଧେ ଦଣ୍ଡ ମୁଁ ପାଉଛି
କେଉଁ ଭୁଲ ପାଇଁ ମୋର ?
ଏମତି କରିକି ଯଶ ସେ ପାଆନ୍ତି
ଈଶ୍ୱରଙ୍କୁ ପ୍ରଶ୍ନ ମୋର।
କୁହ ହେ ଈଶ୍ୱର ତୁମ ଦରବାରେ
କାହିଁ ଏତେ ଅବିଚାର ?
ଧର୍ଯ୍ୟ ଧରି ଶୁଣ ପଚାରୁଛି ପ୍ରଶ୍ନ
ଦେବାକୁ ହେବ ଉତ୍ତର।
——————–
ତପସ୍ୱିନୀ ଜେନା
କୁଜଙ୍ଗ, ଜଗତସିଂହପୁର