ହେ ଲାବଣ୍ୟବତୀ ପରୀ
ଗୋଲାପୀ ଗୋଲାପୀ
ମନ ତ ଗୋଲାପୀ
କି ମଞ୍ଜୁଳ ହେ ରୂପସୀ
ଗୋଲାପ ନଗରୁ
ଆସିଛ କି ସତେ
ହେ ରୂପବତୀ ମାନସୀ !
ଗୋଲାପ ସୁମନ
ଅଙ୍ଗେ ପରିପାଟୀ
ବାସ ପରିଧାନ କରି
ଗୌର ମଥା ସିନ୍ଥି
ଅପରୂପ କାନ୍ତି
ଅହ୍ୟ ସୁଲକ୍ଷଣୀ ନାରୀ ।
ଗୋଲାପର ବର୍ଣ୍ଣ
ନାଲି ଟିପା ଚିହ୍ନ
ପତିବ୍ରତା ସେ ରମଣୀ
ଦେଖିଦେଲେ ସତେ
ମନ ଯିବ ଲାଖି
ଅପଲକ ସେ ଚାହାଣି ।
ପାଦରେ ଅଳତା
ପାଉଁଜି ଘୁଙ୍ଗୁର
ରୁଣୁଝୁଣୁ ଛମଛମ
ହେ ଗଜଗାମିନୀ
ହେ ମୃଗନୟନୀ
ଚାଲି ଗଲେ ଫୁଟେ ପଦ୍ମ ।
ଗୋଲାପୀ ଅଧର
ଗୋଲାପୀ କଙ୍କଣ
ଗୋଲାପୀର ସୂତା ଶାଢ଼ୀ
ନଖେ ରଙ୍ଗାୟିତ
ଗୋଲାପୀ କୁଙ୍କୁମ
ମନଲୋଭା ଶାଢ଼ୀ ଧଡି ।
ଚୋରା ଚାହାଣିରେ
ହାଣି ଦିଅ ସତେ
ନୟନକୁ ତୀର ମାରି
ଥରେ ଚାହିଁ ଦେଲେ
ମନ ହେବ ଭ୍ରମ
ହେ ଲାବଣ୍ୟବତୀ ପରୀ ।
ପ୍ରସନ୍ନ କୁମାର ମେହେର
ଦିଗଶିରା, ଡୁଙ୍ଗୁରିପାଲି,
ସୁବର୍ଣ୍ଣପୁର
76 total views, 1 views today