#ନିସ୍ତବ୍ଧ_ନିଶାର_ନିଶାଚରୀ
**********************
ଅମାବାସ୍ୟାର କିଟିକିଟି ଅନ୍ଧାର
ଅଥଚ ଆକାଶର କଳା ବକ୍ଷ ଚିରି
ଅଜବ ଏକ ତୋଫା ଜହ୍ନର ମୁହଁ
ଆସୁଛି ବାହାରି ।
ଚଉଦିଗ ଶୁନଶାନ୍
କେବଳ ଶ୍ମଶାନର ସେହି ସ୍ଥାନରେ ହିଁ
ପ୍ରବଳ ଝଡ ତୋଫାନ।
ଗୋଟିକ ପରେ ଗୋଟିଏ
ଗଛର ଶାଖା ଭାଙ୍ଗିବାର
କଡ୍ ମଡ ଶବ୍ଦ
ଅଦୃଶ୍ୟ ପାଦରେ ପାଉଁଜିର
ଝୁମ୍ ଝୁମ୍ ସ୍ଵର।
କାହିଁକି ଏ ଅଦ୍ଭୂତ ଦୃଶ୍ୟ ?
ହେଇତ ପୁଣି ଉଠି ଆସୁଛି ମହୁଆ ନିଶୀଥରେ ।
ଫି ଥର ଅମାବାସ୍ୟାର
ନିସ୍ତବ୍ଧ ନିଶାର ନିଶାଚରୀ ।
ତା ଦୁଇଟି ଆଖି
ତପ୍ତ ଲାଭାର ଦୁଇଟି ଆଗ୍ନେୟଗିରି ।
ଉନ୍ମୁକ୍ତ ଘନ ଲମ୍ବା କେଶ
ଅଦୃଶ୍ୟ ହାତରେ ତା
କାହା ରକ୍ତର ଅପେକ୍ଷାରେ ଥିବା
ଶାଣ ଦିଆ ତୀକ୍ଷ୍ମ ଛୁରୀ ।
ମୁୁଁ ଦେଖିଛି !!!
ଶାଢୀ କାନିରେ ମୁହଁ ଲୁଚାଇ
ଯନ୍ତ୍ରଣା ଜର୍ଜରିତ
ତା ଗୁମୁରି ଗୁମୁରି କାନ୍ଦ ।
ମୁୁଁ ପୁଣି ଶୁଣିଛି
ପ୍ରତିଶୋଧ ଅଗ୍ନିରେ ଅଗ୍ନି ସ୍ନାତା
ତାହାରି ବିକଟାଳ ହସ।
ଅଭାଗିନୀର ଏକ ମାତ୍ର ଦୋଷ ଥିଲା ।
ପରଖି ନ ପାରି କାଚ ମଣିକୁ
ବିକ୍ରି ହୋଇଗଲା
ଧନୀ ସୌଦାଗର ହାତେ
ଛଳନାପୂର୍ଣ୍ଣ ବିବାହ ବେଦିରେ ।
ଜାଳିଦେଲେ ଜିଅନ୍ତା
ଯୌତୁକ ଲୋଭି ଜହ୍ଲାଦମାନେ
ଚିର କାଳ ପାଇଁ ଆଖି ବୁଜିଲା ମହୁଆ
ତା ଅଧା ସ୍ଵପ୍ନ ଦେଖା କଅଁଳ ବୟସରେ।
ସିନ୍ଦୁରା ଫାଟି ବାର ବେଳ
ଏଥର ସବୁ କିଛି ଦେଖାଗଲାଣି ଝାପସା ଝାପସା ।
ଏ କଣ ??
ମହୁଆ ଛୁରୀରେ ରକ୍ତର ଛିଟା ।
ଫେରୁଛି ମହୁଆ ଗାଁର ଅନ୍ୟ ପ୍ରାନ୍ତରୁ
ଆଞ୍ଜୁଳାଏ ମୁକ୍ତିର ଫେନିଳ ବାଦଲ
ତୃପ୍ତ ହସ ସହ
ସୁଦୂର ଆକାଶେ ନିଶ୍ଚିହ୍ନ ହେବାକୁ ।
ପୁଣି ଏ କି ଅଶୁଭ ସଂକେତ ??
ଗାଁ ମୁଣ୍ଡରେ ଚିଲମାନଙ୍କ ଚେଁ ଚାଁ
ଉଲୁକ ଅନାଇଛି ଢେମା ଢେମା ଆଖିରେ,
ମାଆସାନ୍ତାଣୀ ଙ୍କ କାନ୍ଦ ବୋବାଳି
ଆବାଳ ବୃଦ୍ଧ ବନିତାଙ୍କ ଭିଡ଼
ହେଇତ ଅଦୁରରୁ ଦେଖାଗଲାଣି
ସାଆନ୍ତ ଆଉ ସାନ ବାବୁଙ୍କ ମଢ ।
#ଦୀପିକା ଦାଶ🪔