**ପ୍ରୀତିଅର୍ଘ୍ୟ**
ଜାନକୀ ମହାନ୍ତ
*******************************
ପ୍ରେମ ଅର୍ଘ୍ୟ ଥାଳି ଆସିଛି ମୁଁ ନେଇ
ଆସ ଆସ ପ୍ରାଣେଶ୍ୱର,
ପ୍ରୀତି ପୁଷ୍ପ ଦେଇ ଚନ୍ଦନ ଲଗାଇ
ପୂଜିବି ତୁମ ପୟର ।।
ସତ୍ୟ ନିଷ୍ଠ ପ୍ରାଣେ ସ୍ନିଗ୍ଧ ଶାନ୍ତ ମନେ
ପ୍ରେମ ଅର୍ଘ୍ୟ ସମର୍ପିବି,
ଈର୍ଷା ଦ୍ୱେଷ ଗୁଣ କରି ଦେବି ତ୍ୟାଗ
ବୋଲି ମୁଁ ଶପଥ ନେବି ।।
ମୋ ହୃଦ ଅଳିନ୍ଦେ ସ୍ଥିତପ୍ରଜ୍ଞ ଭାବେ
ତୁମକୁ ସାଇତି ରଖି,
ପ୍ରୀତି ଅର୍ଘ୍ୟ ବାଢ଼ି ଅଭିମାନ ଛାଡି
ପ୍ରେମ ଦେବି ମନଲାଖି ।।
ପ୍ରୀତି ଅର୍ଘ୍ୟ ଥାଳି ଆଣିଛି ସଜାଡ଼ି
ଫୁଲ ଫଳ ଦୀପ ଜାଳି,
ତୁମ ପାଦ ଧୂଳି ମଥାରେ ମୁଁ ବୋଳି
ପ୍ରୀତି ମଧୁ ଦେବି ଢ଼ାଳି ।।
ଜାନକୀ ମହାନ୍ତ
