ଶ୍ରୀଜଗନ୍ନାଥଙ୍କ ମହାପ୍ରସାଦ
ସଂଯୁକ୍ତା ସାହୁ
ସଂଯୁକ୍ତା
~~~~~~~~~~~~~~~~
ସାରା ବ୍ରହ୍ମାଣ୍ଡରେ ହିନ୍ଦୁ ଶାସ୍ତ୍ରରେ
ବ୍ରହ୍ମବସ୍ତୁ ଯେ ମହାପ୍ରସାଦ
ତାହାର ମାହାତ୍ମ୍ୟ ଅସାଧାରଣ ଯେ
ଗୁଣ,ମହକ,ତୃପ୍ତି ଓ ସ୍ୱାଦ ।
ଶ୍ରୀକ୍ଷେତ୍ରର ଶ୍ରୀଜଗନ୍ନାଥଙ୍କୁ ଅର୍ପିତ
ପ୍ରସାଦ ଗାରିମା ସର୍ବବ୍ୟାପକ
ଆଦରଣୀୟ,ସମ୍ମାନନୀୟ,ପ୍ରଶଂସନୀୟ
ପ୍ରେମରସ ଶକ୍ତିର ଆଧ୍ୟାତ୍ମିକ ।
ତାହାର ପ୍ରସ୍ତୁତିକରଣ ଅତି ବିଚିତ୍ର ପରା
ସାରା ପୃଥିବୀରେ ଏହା ବିରଳ
ବିଶ୍ୱରେ ଖ୍ୟାତି ଲାଭ କରି ଅଭିହିତ
ହୋଇଛି ବୃହତ୍ତ ପାକଶାଳ ।
ମହାପ୍ରସାଦ ଗୋଟିଏ ତାନ୍ତ୍ରିକ ଶବ୍ଦ
ଶ୍ରେଷ୍ଠ ଭୋଗ ଯେ କୁହାଯାଏ
ଦୁଇପ୍ରକାର ଭୋଗ ଶଙ୍ଖୁଡ଼ି ଅସଙ୍ଖୁଡ଼ି
ପ୍ରଭୁଙ୍କୁ ସମର୍ପଣ ହୋଇଥାଏ ।
ଦୈନିକ ଛପନ ପ୍ରକାର ଅର୍ପିତ ଭୋଗ
ଛପନ ପଉଟି ନାମେ ବୋଲାଏ
ଏହି ମହାପ୍ରସାଦକୁ ଅଭଡ଼ା କୁହନ୍ତି
ଐକ୍ୟ,ମୈତ୍ରୀ,ସଦ୍ଭାବନା,କଥା କୁହେ ।
ଏହି ପ୍ରସାଦ କାଠ ଦ୍ୱାରା ଜାଳେଣି ହୁଏ
ନାଲି ହାଣ୍ଡିରେ ପ୍ରସ୍ତୁତ ହୋଇଥାଏ
ଛଅଟି ଶିଖା ଥିବା ଚୁଲିରେ ଥାକ ଥାକ
ହୋଇ ତିନି ଥାକରେ ରନ୍ଧାହୁଏ ।
ସୁପକାରମାନେ ଶୁଦ୍ଧପୂତ ଭାବେ ନିଷ୍ଠାରେ
ପ୍ରଣବ ଉଚ୍ଚାରଣ କରିଥାଆନ୍ତି
ଦଶାକ୍ଷୀର ମନ୍ତ୍ରରେ ଅରୁଆ ଚାଉଳ ପକାଇ
ଲଷ୍ମୀ ବିଜ ସ୍ମରଣ କରନ୍ତି ।
ପ୍ରସାଦର ଷଡ଼ସଂସ୍କାର କରାଯାଇ ବ୍ରହ୍ମତ୍ୱର
ମହାପ୍ରସାଦ ନାମରେ ବିଦିତ
ଆଉ ଥରେ ଏଗାରଟି ସଂସ୍କାର ମାଧ୍ୟମରେ
ମହାପ୍ରସାଦ ହୁଏ ଶୁଦ୍ଧପୁତ ।
ଅମୁଣିଆ, ଅନ୍ନ,ଛେକ,ଭୋଗ,ନୈବେଦ୍ୟ
ପ୍ରସାଦ,ମହାପ୍ରସାଦ,ଅଭଡ଼ା,କୈବଲ୍ୟ
ଏହା ପରଂବ୍ରହ୍ମଙ୍କ ସହିତ ସମାନ ହୋଇ
ଅମୂଲ୍ୟ ପଦାର୍ଥ ରୂପେ ହୁଏ ନିର୍ମାଲ୍ୟ ।
ଏହି ପ୍ରସାଦ ପ୍ରଭୁଙ୍କ ପାଖରେ ଧୂପ ପରେ
ମାଆ ବିମଳାଙ୍କୁ ଅର୍ପଣ କରାହୁଏ
ତାପରେ ମହାପ୍ରସାଦରେ ପରିଣତ ହୋଇ
ଯାହାର ମହିମା,ମହତ୍ତ୍ୱ ମହକାଏ ।
ମାଆ ଲଷ୍ମୀଙ୍କର କୃପାରୁ ମହାପ୍ରସାଦର
ନ ଥାଏ କିଛି ଭେଦଭାବ
ବ୍ରାହ୍ମଣଠାରୁ,ଚଣ୍ଡାଳ,ଛୁଆଁ ଅଛୁଆଁ,ଶଙ୍ଖୁଡ଼ି
ଅଇଁଠା,ସାନ ବଡ଼ ନ ବାଛିବ ।
ସଂଯୁକ୍ତା ସାହୁ
