🌳ଟିପେ ପୃଥିବୀର ମୋହ 🌳
ପ୍ରତିମା ବାରିକ
🌿🌿🌿🌿🌿🌿🌿
ଏ ମାଟି ଆକାଶ ତା ପାଣି ପବନ
ଯହିଁରେ ଗଢା ଏ ଦେହ
ସୁରୁଜ ଚନ୍ଦ୍ରମା ବଣ ଶ୍ୟାମଳିମା
ବାନ୍ଧି ରଖେ ତାର ମୋହ ।
ତାହାରି ଭିତରେ ଝାଟି ମାଟିର ଏ
ଟିକି କୁଡିଆଟି ମୋର
ସ୍ବର୍ଗଠୁ ସୁନ୍ଦର ମଧୁ ଠୁ ମଧୁର
ଶାନ୍ତିମୟ କୋଳ ତାର ।
ଦିନେ ଦିନ ପତି ନିଶିରେ ଶଶାଙ୍କ
ଉଙ୍କି ମାରି ଦେଖୁଥାନ୍ତି
ଖଟିଆରେ ଗଡି ଉପରେ ଚାହିଁଲେ
ହସୁଥାନ୍ତି ତାରାପଂକ୍ତି ।
ଚାଖଣ୍ଡେ ବାଡିର ଲଙ୍କା ବୋଇତାଲୁ
ଭେଣ୍ଡି କଖାରୁ ସଜନା
ଜହ୍ନି ଫୁଲ ହସେ ଚାଳ ପରେ ଥାଇ
ସ୍ବାଦିଷ୍ଟ ଦେଖି ବ୍ୟଞ୍ଜନା ।
ଦୂର ଦେଶେ ଟାଣେ ଜୀବନର ସ୍ବାଦ
ଟିପେ ପୃଥିବୀର ମୋହ
ତାହାରି କୋଳକୁ ଫେରି ଆସିବାକୁ
ହୃଦୟରେ ଜାଗେ କୋହ ।
ପ୍ରତିମା ବାରିକ