** ଟିପେ ପୃଥିବୀର ମୋହ **
ଅନ୍ତର୍ଯ୍ୟାମୀ ମିଶ୍ର
******************************
ଭୁଲା ମନଟେ ପାଇଁ ବେଳେବେଳେ ଗର୍ବ ଆସୁଛି,
ସେତିକି ନଥିଲେ କି’ ହିନସ୍ତା !
କାନ କୁଣ୍ଡେଇ କୁଣ୍ଡେଇ, ଆହୁରି କେତେ ଝୁଣ୍ଟିବାକୁ ପଡନ୍ତା !
ଦେଖି ନଦେଖିଲା ପରି
ଜାଣି ନଜାଣିଲା ପରି
ନୀରବରେ ଦୁଃଖସୁଖ ହେବା କି’ ଦୁଃସାଧ୍ୟ ବ୍ୟାପାର !
ଦି’ତିନି ଘଣ୍ଟାର ଉତ୍ସବକାଳୀନ ରହଣି
ଦି’ତିନି ଦଶନ୍ଧିର ହିସାବରେ ଫୁଟିଫୁଟି ମରିଛି କେତେ ପାଣି
କେତେ କ୍ଷୀରରେ କେତେ ରାବିଡି , କାହା ଭାଗରେ କେତେ
ସହଜ ନୁହେଁ ଦୀର୍ଘଶ୍ଵାସର ଠିକ୍-ଚିହ୍ନ ଦେଇ, ଯାନ୍ତ୍ରିକ ଲେଉଟାଣି ।
ଗାଡି ଛାଡ଼ିବା ଉପରେ ,
ବାଲି ରୁଆଟେ କି’ ଆଉ କ’ଣଟେ ଆଖିରେ ପଡ଼ି
ଭରିଗଲାଣି ପାଣି, ଜାଲୁଜାଲୁଆ ଦିଶୁଛି ଆଗକୁ
ପଛରେ କିଛି ଛାଡି ଯାଉନି ତ ?ପଚାରି ପାରୁନି କାହାକୁ ।
ଆଗକୁ ନା’ ପଛକୁ ଯିବାର ନିଷ୍ପତ୍ତି ସହସା ନେଇପାରୁନି,
ଯାହା କୁହ, ଏ ଭୁଲା ମନକୁ ଜମା ପାରିଲିନି ।
***–***
ଅନ୍ତର୍ଯ୍ୟାମୀ ମିଶ୍ର
Thanks dear founder, admin and office holders for conferring this recognition to my poetic effort . Feel inspired .