କରିବ ନାହିଁ ଅଭାବ
ମୃତ୍ୟୁଞ୍ଜୟ ସାହୁ
******************************
ଏ ଧରା ଶ୍ରାବଣେ ଆଖି ଶ୍ରାବଣୀରେ
ଧୋଇ ମୁଁ ତୁମ ପୟର,
ଆହେ ଭୋଳାନାଥ ହୋଇ ମଥାନତ
କରୁଛି ଗୁହାରି ମୋର |
ତୁମେ ପରା ପ୍ରଭୁ ଶ୍ମଶାନରେ ରହି
ବିଭୁତିକୁ ଅଙ୍ଗେ ଲେପ,
ସେଥିପାଇଁ ତୁମେ ମହାକାଳ ନାମେ
ଦେଖାଅ ତୁମ ପ୍ରକୋପ |
ମୋ ଦେହ ବିଭୂତି ତୁମ ଶ୍ରୀ ଅଙ୍ଗରେ
କେବେ ପ୍ରଭୁ ଲାଗି ହେବ,
ମିଛ ମାୟା ଏଇ ସଂସାର ମୋହରୁ
ମୁକ୍ତି ଦେବେ ମହାଦେବ |
ପ୍ରାଣୀଙ୍କ ମଙ୍ଗଳେ ଜଗତ କଲ୍ୟାଣେ
କରିଥିଲେ ପାନ ବିଷ,
ଆହେ ନୀଳକଣ୍ଠ ମୋ ପାପକୁ ଶୋଷି
କରିଦିଅ ମୋର ନାଶ |
ତାଣ୍ଡବେ ତୁମର କର ଥରହର
ସ୍ୱର୍ଗ ମର୍ତ୍ତ୍ୟ ଓ ପାତାଳ,
ଆହେ ତ୍ରିଲୋଚନ ଖୋଲ ହେ ନୟନ
ଦେଖାଅ ତୁମର ଖେଳ |
ଆହେ ପଶୁପତି ତୁମ ବିନା ମୁକ୍ତି
ମୋ ପାଇଁ ନୁହେଁ ସମ୍ଭବ,
କରୁଣାର ବାରି ମାଗେ ହାତ ଯୋଡି
କରିବ ନାହିଁ ଅଭାବ |
ମୃତ୍ୟୁଞ୍ଜୟ ସାହୁ