ବିଶ୍ବ ମହିଳା ଦିବସ
ପ୍ରାଚିର ପତ୍ରରେ କିଲାଭ ଏଥିରେ
ସଭାସମିତିକୁ କରି
ଭାଷଣ ବାଜିରେ ପେଟତ ନପୁରେ
ମିଛେ ପକାଉଛ ହୁରି।
ନାରୀଙ୍କୁ ସମ୍ମାନ ଦିଅନ୍ତି ଭାଷଣ
ନାରୀଙ୍କୁ ଧର୍ଷଣକରି
ଧରାପଡ଼ିଯିବ ତାହାଙ୍କ ସ୍ବଭାବ
ଜଳାଇ ଦିଅନ୍ତି ମାରି।
ନାରୀଙ୍କ ନାମରେ ଯୋଜନାକୁ କରେ
ଲୁଣ୍ଠିତା ହୁଅଇ ନାରୀ
ଧନ୍ୟ ୟାଙ୍କ ନୀତି ଫୁଲାଇଣ ଛାତି
ମାରୁଥାନ୍ତି ବାହାଦୁରି।
ନାରୀଙ୍କ ନାମରେ ବରଷକୁ ଥରେ
ଦିନଟି ଉତ୍ସର୍ଗକରି
ବଳକା ଦିନରେ ଜଳାନ୍ତି ଜୁଇରେ
ନଶୁଣେ ତା’ର ଗୁହାରି।
ବଞ୍ଚିଛି ଅଞ୍ଜନା ସହିଣ ଯାତନା
ଛବି ବିଳାସିନୀ ପରି
ଇତିଶ୍ରୀ ବେବିନା ସ୍ମିତାଠୁଁ ମମିତା
କେତେ ଯେ ଦେଲେଣି ମାରି।
ବିକଳେ କାନ୍ଦନ୍ତି ନ୍ୟାୟକୁ ମାଗନ୍ତି
ମହିଳା କମିସନରେ
ଅଧ୍ୟକ୍ଷ ତାହାର ନଦିଏ ଉତ୍ତର
ବସିଅଛି ମଉନରେ।
ମହିଳା ଦିବସେ ମଞ୍ଚା ବାନ୍ଧି ବସେ
କୁମ୍ଭୀର କାନ୍ଦଣା କାନ୍ଦେ
ଦୋଷୀକୁ ଘୋଡ଼ାଇ ନିର୍ଦୋଷୀକୁ ନେଇ
ଦୋଷୀ ହିସାବରେ ଛନ୍ଦେ।
ଭାସ୍କର ରାଉତ
ଦେବମାୟା ଭବନ
ଶେରଗଡ଼, ଗଞ୍ଜାମ
31 total views, 2 views today