ବସନ୍ତର ଅଭିଷେକ

ଋତୁରାଜ ବସନ୍ତର ଅଭିଷେକ ହେବ ଗୋ ମିତଣୀ
ସାଜକର ସୁଗନ୍ଧିତ ସଜଫୁଲେ ଅଭିଷେକ ଥାଳି,
ମଧୁମୟ ମଧୁକାଳ ଆଗମନେ ପ୍ରକୃତିର ରାଣୀ
ସଜାଇଛି ଚନ୍ଦନର ଅର୍ଘ୍ୟ ଥାଳି –ଶିମୁଳି- ଦୀପାଳି ।

କୋଇଲି ପଞ୍ଚମ ସ୍ଵନେ ଗାଇଲାଣି ସ୍ଵାଗତ ସଙ୍ଗୀତ
ନୃତ୍ୟରତ ପ୍ରଜାପତି,ମଧୁମକ୍ଷି , ଆମ୍ର ପୁଷ୍ପ ବନେ
ରକ୍ତଜବା ପଲାଶର ହୋମକୁଣ୍ଡେ ବହ୍ନି ପ୍ରଜ୍ଜୋଳିତ
ବଉଳର ବାସ୍ନା- ଧୂପ ମଧୁମୟ ମଳୟ ପବନେ ।

ନବ ପଲ୍ଲବର ଶାଢି ପିନ୍ଧିଅଛି ପ୍ରକୃତିର ରାଣୀ
କୃଷ୍ଣଚୂଡ଼ା ତୋରଣରେ, ଫଗୁରଙ୍ଗେ ମଣ୍ଡପ ସଜ୍ଜିତ
ନୀଳ ନିର୍ମେଘ ଆକାଶେ ନିଷ୍କପଟ ହୃଦୟ ରାଗିଣୀ
ଶୁଭୁଅଛି କୁମ୍ଭାଟୁଆ ମନ୍ତ୍ର ଗାନ ଭ୍ରମର ସଙ୍ଗୀତ ।

ପ୍ରେମର ଅମୃତ ବାରି ତନୁ ମନେ ଆଣଇ ପୁଲକ
ଆସ ଗୋ ମିତଣୀ ଆସ ବସନ୍ତର ହେବ ଅଭିଷେକ ।

ପ୍ରଶାନ୍ତ କୁମାର ମହାପାତ୍ର
କେନ୍ଦ୍ରୀୟ ବିଦ୍ୟାଳୟ କନ୍ଧମାଳ
ଜି- କନ୍ଧମାଳ

 187 total views,  1 views today

Leave a Reply

Your email address will not be published. Required fields are marked *