ଅଳସ ଆଖିରେ ସୁଖ ସପନ
କର୍ମ ପାଇଁ ନର ଆସିଛି ସଂସାର
କର୍ମ କରି ଯିବ ସାରା ଜୀବନ,
ତା’ବିନା ସୁଦିନ ଦେଖିବ କେସନ
ଅଳସ ଆଖିରେ ସୁଖ ସପନ!
ପ୍ରାରବ୍ଧ ସଙ୍ଗତେ ଆସଇ ମରତେ
ଭୋଗିବ ଭୁବନ କର୍ମ ସଂଯୋଗେ,
ଭବ ସୁଖ ଦୁଃଖ କରି ଯିବ ଭୋଗ
ଆପଣାର ସାର ଅସାର ଭାବେ,
ଅକର୍ମା କିପରି ଅରଜିବ ଶିରୀ
ସୁଖ ଶିଖରରେ କାଟିବ ଦିନ?
କର୍ମ ପାଇଁ ନର ଆସଛି ସଂସାର
କର୍ମ କରି ଯିବ ସାରା ଜୀବନ।
କଳ୍ପନା ବିଳାସ ମିଥ୍ୟା ଅବଶୋଷ
ଦୁଃଖର ଭୋଗରେ ଜୀବନ ସଢ଼େ,
ଅଭାବରେ ଆଶା ବଢ଼ାଏ ଦୁର୍ଦ୍ଦଶା
ଦିବସ ସ୍ୱପ୍ନ କି ଭୁବନ ଗଢ଼େ?
ଅଳସ ପଣରେ ଅଭାବୀ ମନରେ
ସୁଖ କି ଆସିବ ମଣିଷ ପାଶେ,
ଅଯଥାରେ ବସି ସପନ ବିଳାସୀ
ବିଧାତା ନିନ୍ଦଇ ଆପଣା ଦୋଷେ,
କର୍ମ ବିନା ଜୀବ ସୃଷ୍ଟି କି ସମ୍ଭବ
ପୂର୍ବ କର୍ମ ଫଳ ଭାଗ୍ୟ ନିଦାନ,
ତା,ବିନା ସୁଦିନ ଦେଖିବ କେସନ
ଅଳସ ଆଖିରେ ସୁଖ ସପନ!
କର୍ମ ମାନବର ସୁଖର ଦୁଃଖର
ଭୋଗ ଦୁର୍ଯୋଗର ସତ୍ୟ ସିଦ୍ଧାନ୍ତ,
ଭବ କର୍ମକ୍ଷେତ୍ର ଜୀବ ନିୟୋଜିତ
ପ୍ରାରବ୍ଧ ସଂଯୋଗ ବିଧି ସମ୍ମତ!
ସୀମାଞ୍ଚଳ ପଣ୍ଡା
ଶିକ୍ଷକ, ଡେଙ୍ଗାଡି,
ଗଞ୍ଜାମ
52 total views, 1 views today