ଅଭିନନ୍ଦନ ଶ୍ରାବଣ

ଆଷାଢ଼ର ଶେଷେ ଶ୍ରାବଣ ର ହୁଏ
ଆଗମନ ଧରାପୃଷ୍ଠେ,
ହର୍ଷିତ ଧରଣୀ ସ୍ୱାଗତ ଜଣାଏ
ଆନନ୍ଦ ଫୁଟାଇ ଓଷ୍ଠେ।୧।

ପିପାସିତ ଧରା ଶ୍ରାବଣର ଧାରେ
ଝୁମଇ ପ୍ରାନ୍ତ ରୁ ପ୍ରାନ୍ତ,
ଉନ୍ମାଦ ତନ୍ମୟେ ବାରିଦର ମାଳା
ବରଷଇ ଅବିଶ୍ରାନ୍ତ।୨।

ନିଦାଘ ଗ୍ରୀଷ୍ମର ସନ୍ତାପ ର ଅନ୍ତେ
ମହୀ ହୁଏ ଆଶ୍ୱାସିତ,
ଅସହ୍ୟ ଯାତନା ମନରୁ ବିସ୍ମରି
ଆନନ୍ଦରେ ବିଭାସିତ।୩।

ଶ୍ରାବଣ ର ଧାରା କରେ ଆପ୍ଲାବିତ
ଶୁଷ୍କ ଧରିତ୍ରୀ ର ବକ୍ଷ,
ନଦୀନାଳ ସର୍ବ ଉଛୁଳନ୍ତି ଉର୍ଦ୍ଧ୍ବ
ଧାରାରେ ହୋଇ ସମକ୍ଷ।୪।

କୃଷକ ବର୍ଗଟି ହରଷ ଚିତ୍ତରେ
କର୍ଷଣ କରେ ପୃଥିବୀ,
ବିହନକୁ ବିଞ୍ଚି ଆଶାକୁ ସଞ୍ଚାରେ
ଦୁର୍ଦ୍ଦିନ ଦୂର କରିବି।୫।

ବିହଙ୍ଗମ ସହ ସର୍ବ ଜୀବଜନ୍ତୁ
ଆହ୍ଲାଦ ମନେ ଭରନ୍ତି,
ଶ୍ରାବଣ ଧାରାରେ ସିକ୍ତସମ ହୋଇ
ଖାଦ୍ୟ ଆଶେ ବିଚରନ୍ତି।୬।

କମନୀୟ କାନ୍ତି ପ୍ରକୃତିର ଦେଖି
ସତତ ଫୁଟେ ଫୁଆରା,
ମହାଦେବ ଯେଣୁ ପାଇଣ ପ୍ରସନ୍ନ
ମସ୍ତକେ ଜଳର ଧାରା।୭।

ଅଭିନନ୍ଦନ ହେ ଶ୍ରାବଣ ଗୋ ତୁମ
ଚରଣ ଶୁଭ ସଙ୍କେତ,
ସବୁଜ ସୁନ୍ଦର ସବୁଜିମା ହେଉ
ଧରଣୀର ଶୁଷ୍କକ୍ଷେତ।୮।

 

ଜ୍ୟୋତିଶଙ୍କର ତ୍ରିପାଠୀ
ଜୟପୁର

Leave a Reply

Your email address will not be published. Required fields are marked *