ଅନୁଭୂତିରେ ସୂର୍ଯ୍ୟୋଦୟ ପରିବାର
________________________________
ସୂର୍ଯ୍ୟୋଦୟ ଭାଷା ସାହିତ୍ୟ ପ୍ରତିଷ୍ଠାନ (Suryodaya Literary Foundation – SLF) ଏପରି ଏକ ଅନ୍ତର୍ଜାତୀୟ ଅନୁଷ୍ଠାନ ଯାହା ବଣମଲ୍ଲୀ ପରି ଝରି ପଡ଼ୁଥିବା ଅସଂଖ୍ୟ ଯୁବ ପ୍ରତିଭାମାନଙ୍କୁ ମାର୍ଜିତ କରାଇ ବିଶ୍ଵ ଦରବାରରେ ପରିଚିତ କରାଇବାର ମହାନ୍ ଭୂମିକା ଗ୍ରହଣ କରିଛି । ଏହି ପରିପ୍ରେକ୍ଷୀରେ ମୁଁ ଏହି ପରିବାରରେ ସାମିଲ ହେବା ଦିନ ଠାରୁ ଆଜି ପର୍ଯ୍ୟନ୍ତ ମୋ ସହ ଘଟିଥିବା ଖଟା ମିଠା ଅନୁଭୂତିକୁ ଏହି ପ୍ରବନ୍ଧ ମାଧ୍ୟମରେ ବାଣ୍ଟିବାକୁ ଏକ ସୁବର୍ଣ୍ଣ ସୁଯୋଗ ପାଇ ନିଜକୁ ଧନ୍ୟ ମଣୁଛି ।
ମୁଖପୁସ୍ତିକା ମାଧ୍ୟମରେ ଏହି ଅନୁଷ୍ଠାନରେ ଯୋଡ଼ି ହେବା ପରେ ମୁଁ ଏହାର ପ୍ରତିଷ୍ଠାତା ତଥା ସମ୍ପାଦକ ଶ୍ରୀମାନ ମନୋଜ କୁମାର ପଣ୍ଡା ଭାଇଙ୍କ ସଂସ୍ପର୍ଶରେ ଆସିଥିଲି । ସେ ମୋତେ ସୂର୍ଯ୍ୟୋଦୟରେ ଯୁବ ପ୍ରତିଭାମାନଙ୍କୁ ନେଇ ହେଉଥିବା ଗବେଷଣା ସମ୍ପର୍କରେ ଅବଗତ କରାଇଥିଲେ । ପରବର୍ତ୍ତୀ ପର୍ଯ୍ୟାୟରେ ମୁଁ “SLF Youth Icon Award Contest – 2022” ର ସ୍ଵତନ୍ତ୍ର ଗବେଷଣାରେ ଅନ୍ତର୍ଭୁକ୍ତ ହେଲି ।
ଏହା ପରେ ମୁଁ ଅନୁଷ୍ଠାନର ସମସ୍ତ କର୍ମକର୍ତ୍ତାଙ୍କ ସହ ଧୀରେ ଧୀରେ ପରିଚିତ ହୋଇଛି । ସମସ୍ତଙ୍କ ସ୍ନେହ, ସଦୁପଦେଶ ତଥା ମାର୍ଗଦର୍ଶନ ଦ୍ଵାରା ମୁଁ ମୋ ଲେଖାକୁ ମାର୍ଜିତ କରି ପାରିଛି ଏବଂ ବିଭିନ୍ନ ସାହିତ୍ୟିକ ଶବ୍ଦର ପ୍ରୟୋଗ, ସଂଯୋଜନା ତଥା ତା’ର ଅର୍ଥ ଓ ବୈଶିଷ୍ଟ୍ୟ ବିଷୟରେ ଅବଗତ ହୋଇ ପାରିଛି । ନିଜ ଲେଖାରେ ଥିବା ଭୁଲ୍ ତ୍ରୁଟିକୁ ଜାଣି ତାକୁ ସୁଧାରିବାର ସୁଯୋଗ ଲାଭ କରିଛି । ତତ୍ ସହିତ ବିଭିନ୍ନ ନୂତନ ଅନ୍ତର୍ଜାତୀୟ ଶୈଳୀର କବିତା ଲେଖିବା ମଧ୍ୟ ଶିଖି ପାରିଛି । ଏହି ଶିକ୍ଷା ଏଯାବତ୍ ଅବ୍ୟାହତ ରହିଛି ଓ ରହିବ । ଏପରି ଏକ ଶୈଖିକ ତଥା ଶୃଙ୍ଖଳିତ ବାତାବରଣ ବାସ୍ତବରେ ବିରଳ । ସୂର୍ଯ୍ୟୋଦୟର ଏଭଳି ଅଦ୍ୱିତୀୟ ପ୍ରୟାସକୁ ମୁଁ ମଥାନତ ସମ୍ମାନ ଜଣାଉଛି ।
ପ୍ରତିଯୋଗିତାର ପ୍ରଥମ ପର୍ଯ୍ୟାୟରେ ଲିଖିତ ସାକ୍ଷାତକାରର ମାର୍ମିକ ତଥା ଚିନ୍ତାମୂଳକ ପ୍ରଶ୍ନାବଳୀ ସବୁ ଥିଲା ସୃଜନାତ୍ମକ ଚିନ୍ତାଧାରା ଉଦ୍ରେକକାରୀ । ଏହା ଅତୀତର କିଛି ବିସ୍ମୃତ ସ୍ମୃତି ସ୍ମରଣ କରାଇବା ସହ ଭବିଷ୍ୟତ ଯୋଜନା ପ୍ରସ୍ତୁତି ପାଇଁ ମଧ୍ୟ ଭରି ଦେଇଥିଲା ତତ୍ପରତା । ଦ୍ଵିତୀୟ ପର୍ଯ୍ୟାୟରେ କବିତା/ଗଳ୍ପ ଆବୃତ୍ତି ଭିଡ଼ିଓ ପ୍ରସ୍ତୁତ କରିବା ଦ୍ୱାରା ଏକ ନୂତନ ଅଭିଜ୍ଞତା ସୃଷ୍ଟି ହେବା ଉପସ୍ଥାପନ ଶୈଳୀ ତଥା ଆବୃତ୍ତି ହୋଇ ପାରିଥିଲା ମାର୍ଜିତ । ତୃତୀୟ ପର୍ଯ୍ୟାୟର ଲାଇଭ୍ କାର୍ଯ୍ୟକ୍ରମ ମଧ୍ୟ ହୋଇ ପାରିଛି ଖୁବ୍ ଆହ୍ବାନମୂଳକ ତଥା ପ୍ରତିଭା ଏବଂ ଜ୍ଞାନ ଉଦ୍ରେକକାରୀ ।
ଏହି ପ୍ରେରଣାଦାୟୀ ପରିବାରର ଏକ ଅଂଶ ରୂପେ ନିଜକୁ ଦେଖି ମୁଁ ଅତ୍ୟନ୍ତ ଗର୍ବ ଅନୁଭବ କରୁଛି । ଆପଣମାନଙ୍କ ଭଳି ଜ୍ଞାନୀ ଗୁଣୀ ମାନଙ୍କ ସଂସ୍ପର୍ଶରେ ରହି ମୁଁ ଯତ୍ କିଞ୍ଚିତ ଜ୍ଞାନ ପାଇ ପାରିଛି ତାହାରି ପରାକାଷ୍ଠାରେ ମୋର ଲେଖନୀ ଚଳଚଞ୍ଚଳ ହୋଇଛି । ସମସ୍ତ ପ୍ରତିଯୋଗୀ ଭାଇ ଓ ଭଉଣୀମାନେ ମୋ ପାଇଁ ପ୍ରେରଣାର ଉତ୍ସ ଅଟନ୍ତି ଏବଂ ସମସ୍ତେ ମୋତେ ଖୁବ୍ ସ୍ନେହ ମଧ୍ୟ କରନ୍ତି, ଏଣୁ ମୁଁ ଅତ୍ୟନ୍ତ ଆନନ୍ଦିତ । ସେମାନଙ୍କ ଲେଖାରୁ ମୁଁ ଅନେକ କିଛି ଶିକ୍ଷା ଲାଭ କରିପାରେ ଏବଂ ଜୀବନ ପଥରେ ଅଗ୍ରସର ହେବାର ପ୍ରେରଣା ଲାଭ କରେ ।
ସମସ୍ତ ଯୁବ ପ୍ରତିଭାଙ୍କୁ ମୋର ହୃଦୟରୁ ଶୁଭେଚ୍ଛା ଓ ଅଭିନନ୍ଦନ ଏବଂ ଅନୁଷ୍ଠାନର ସମସ୍ତ କର୍ମକର୍ତ୍ତା, ମାର୍ଗଦର୍ଶକ, ମାର୍ଗଦର୍ଶିକା ମାନଙ୍କୁ ମୋର ସମ୍ମାନ, ଶ୍ରଦ୍ଧା ତଥା ଭକ୍ତିଭରା ପ୍ରଣାମ । ଆପଣ ସମସ୍ତଙ୍କ ଆଶୀର୍ବାଦ, ସ୍ନେହ, ସଦିଚ୍ଛା, ପ୍ରେରଣା ତଥା ମାର୍ଗଦର୍ଶନ ମୋର ଏକାନ୍ତ କାମ୍ୟ ।
ସର୍ବୋପରି ଏତିକି କହିବାକୁ ଚାହେଁ ଯେ, ଶିକ୍ଷା ସର୍ବଦା ପୁରସ୍କାର, ସମ୍ମାନ ଓ ପଦବୀ ଠାରୁ ମହାନ୍ । ଏଣୁ ପୁରସ୍କାରମନସ୍କ ହେବା ପରିବର୍ତ୍ତେ ଶିକ୍ଷାମନସ୍କ ହେବା ଶ୍ରେୟସ୍କର । ତେଣୁ ଆସନ୍ତୁ ସମସ୍ତେ ଜ୍ଞାନପିପାସୁ ହୋଇ ନିଜ ସମୟର ସଦୁପଯୋଗ କରିବା ସହ ନିଜ ଜୀବନକୁ ନିଜ ହାତରେ ଗଢ଼ି ତୋଳିବା ।
ଧନ୍ୟବାଦର ସହ
ପ୍ରିୟଦର୍ଶିନୀ ମହାପାତ୍ର
ଗଞ୍ଜାମ
ଧନ୍ୟବାଦ୍ ଦିଦି
ବହୁତ ସୁନ୍ଦର ଉପସ୍ଥାପନା dear ♥️♥️
ବାଃ ବହୁତ ସୁନ୍ଦର ଉପସ୍ଥାପନା ସାନ ଭଉଣୀ ❤
ଧନ୍ୟବାଦ୍ ଦିଦି