😕 ଅପେକ୍ଷା ର ମୁହୂର୍ତ୍ତ 😕
___________________
ଉପହାସ କରେ ଆଜି ସମୟ ମୋ ସାଥେ
କି ଦୋଷ ର ନିଏ ପ୍ରତିଶୋଧ,
ଦ୍ରୁତଗତି ତାର ହୋଇଲାକି ଅଚଞ୍ଚଳ
କିବା କେହି କଲା ଗତିରୋଧ l
ଦ୍ରୁତ ହେଉଛି ସ୍ପନ୍ଦନ,
ବିଚଳିତ ମନ,
ଅଟ୍ଟହାସ୍ୟେ ପୁରିଛି ଭବନ ll
ପ୍ରାପ୍ତି ଅପ୍ରାପ୍ତି ର ଆଶଙ୍କା ର ଜାଗରଣ
ମନେ କରେ ଭୟର ସଂଚାର,
କ୍ଷଣକାଳ ମୋତେ ଆଜି ଲାଗେ ଯୁଗ ପରି
ପୃଥିବୀ କି ହେଲା ବ୍ରହ୍ମପୁର l
ନୂତନ ଗନ୍ତବ୍ୟ ପଥ,
ସନ୍ଧାନୀ ମୋ ନେତ୍ର,
ଏକସ୍ଥାନେ ହୋଇଅଛି ସ୍ଥିର ll
ଅପେକ୍ଷା ଅନ୍ତରାଳେ ବୁଡ଼ିଲାକି ଭାବନା
ସର୍ଜୁନି ଆଉ ନୂଆ ସୃଷ୍ଟିର,
କି ଅବା ଶେଷହେଲା କଲମର ମୁନ
ରଚୁନାହିଁ ଔଜଲ୍ୟ ପ୍ରେମର l
ପଞ୍ଚାନ୍ଦ୍ରିୟ ହେଲା ଜଡ଼,
ହୁଏ ହନ୍ତସନ୍ତ,
ତଥାପିବି ହେଉନି ତା ଅନ୍ତ ll
ନାହିଁ କାର ଦୋଷ ଏତ ମୋର ଦୁର୍ବଳତା
ଅତି ଭଲ ପାଇବା ର ଦୋଷ,
ଏକା ଏକା ଲାଗେ ଆଜି ସଂସାରଟା ମୋତେ
ହୋଇ ଯାଏ ମୁଁ ଅଣନିଶ୍ୱାସ l
ଆଉ ହୁଏନି ପ୍ରତୀକ୍ଷା,
ନାଶ ଅପେକ୍ଷା ର,
ଶୀଘ୍ର ଯାଅ ହେ ସମୟ ବୀର ll
ଶୀଘ୍ର ଯାଅ ହେ ସମୟ ବୀର ll
_________________________
ନିର୍ମଳ ବାରିକ
