ତୁମେ ଆସୁଛ ବୋଲି
★★★★★★★★
ତୁମ ପ୍ରତୀକ୍ଷାରେ
ଅସରନ୍ତି ଦିନ ଗୁଡିକ ଗଣି ଗଣି
ଶେଷରେ ପୂର୍ଣ୍ଣଛେଦଟିଏ ପଡିଛି
ଆଜି ତୁମେ ଆସିବ ବୋଲି
ପାଦ ମୋର ଜମା ତଳେ ଲାଗୁନି
ମନ ବି ଆଉ ବୋଲ ମାନୁନି ।
ଜାଣିଛ..??
ଇଲିଶି ମାଛ ରାନ୍ଧିଛି ତୁମ ପସନ୍ଦର
ସଜ୍ଜିତ କରିଦେଇଛି ଶୟନ କକ୍ଷକୁ ଆମର ।
ମୋ ପସନ୍ଦର ଗୋଲାପି ପରଦା
ଟାଣିଦେଇଛି କବାଟରେ
ଆଉ ତୁମରି ପସନ୍ଦର
ବାଇଗଣୀ ରଙ୍ଗର ଚାଦର
ବିଛାଇଦେଇଛି ଆମ ଶଯ୍ୟାରେ ।
କ୍ଷୀଣ ଆଲୋକ ଯୁକ୍ତ
ନୀଳରଙ୍ଗର ସ୍ୱପ୍ନିଳ ଆଲୋକ
ଲଗାଇ ଦେଇଛି କାନ୍ଥରେ
ଶୟନ କକ୍ଷରେ ଶିହରଣ ଖେଳୁଛି
ରୁମ ଫ୍ରେସନର୍ ର
ମହମହ ରଜନୀଗନ୍ଧା ବାସରେ ।
ମୁଁ ଜାଣେ ତୁମେ ମୋତେ ଛୁଉଁ ଛୁଉଁ
ବନ୍ଧା କେଶ ସବୁ ଅସଜଡ଼ା ହୋଇଯିବ,
ପାଦରୁ ପଟେ ପାଉଁଜି ଖସିଯିବ,
ଓଠର ଲିପଷ୍ଟିକ ଆଉ ଆଖିର କଜଳ
ମୋ ମୁଖରେ ଲଜ୍ଜାର ଚିତ୍ର ଆଙ୍କିଦେବ,
ତୁମେ ଆସିବାର ଠିକ୍ ପରେ ପରେ
ଗଭା ରୁ ମୋର ଗଜରା ଛିଡ଼ିପଡ଼ି
ଏଣେତେଣେ ଖସି ପଡୁଥିବ ।
ଅମାପ ଉନ୍ମାଦନା
ମୋ ଭିତରେ ତୁମ ଲାଗି
କରିଛି ମୁଁ ଶୃଙ୍ଗାର
ତୁମ ଆଖିର ଆଇନାକୁ ଦେଖି
ତୁମେ ମୋ ସୁହାଗ
ଦେଖ ତୁମ ପାଇଁ ମୁଁ
ଅଭିସାରିକାର ଶୃଙ୍ଗାର ସାଜିଛି ।
ତୁମକୁ ଭଲଲାଗେ ବୋଲି
ସେଇ ହଳଦିଆ ପତଳା ଶାଢ଼ୀକୁ ପିନ୍ଧିଛି
ବାରମ୍ବାର ମୁରୁକି ମୁରୁକି ହସି
ତୁମ ଫୋଟୋକୁ ଆଣି ଦେଖୁଛି ।
ମନ ମୋର ଅସମ୍ଭାଳ
ହୃଦୟ ବି ଭାବବିହ୍ଵଳ
ଯେତେଯେତେ ନିକଟତର ହେଉଛି
ତୁମ ଆସିବାର ବେଳ ।
◆◆◆◆◆◆◆◆◆◆
#ଦୀପିକା ଦାଶ
