ଭାଙ୍ଗିଦିଅ ଅଭିମାନ ପ୍ରିୟ
*******************
ଏଇ ଶୁଣୁଛ ଶୁଣ
ତୁମେ ଶୋଇଗଲ
ନା ଜାଣିଶୁଣି
ଅଭିମାନରେ ଶୋଇଛ ?

ମୁଁ ଜାଣେ ଠିକ୍ ଜାଣେ
ମୋତେ ଅପେକ୍ଷାରତ ନାୟକଟି
ଆଜି ମିଛିମିଛିକା ଶୋଇଯାଇଛି ।
କେବଳ ମୋତେ ଚିଡାଇବାକୁ
ଗୋଟିଏ ଆଖି ଖୋଲି
ଆଉ ଗୋଟିଏ କୁ ବନ୍ଦ କରି
ମିଟି ମିଟି କରୁଛି ।

କଣ ଯେ
କେତେ ଡାକିଲେ ବି ଶୁଣୁନାହଁ
ତକିଆକୁ ଜାବୁଡି ରେଜେଇ ଘୋଡ଼ି
କାନ୍ଥ ଆଡକୁ ମୁହଁ ବୁଲେଇ
ମୋତେ ପିଠି କରି ଶୋଇଯାଉଛ ?

ଥରୁଟିଏ ଭାବ ତ
କେତେ ପାଉଛି ମୁଁ କଷ୍ଟ
ମୋ ଆଖିରୁ ନିଦ ହଜାଇ
ମୋ ଧୈର୍ଯ୍ୟର ଦୀପଟିକୁ ଲିଭାଇ
ମିଳନର ଏଇ ଘଡ଼ିସନ୍ଧି ମୁହୂର୍ତ୍ତରେ
ଆଲିଙ୍ଗନ କରିନିଅ ମୋତେ
ଆଉ ଛଟପଟ ନ କରାଇ ।

ପ୍ରେମ ପ୍ରଣୟର ଦହନରେ
ମୁଁ ଦଗ୍ଧିଭୂତ ହେଲା ବେଳେ
ତୁମକୁ ଥଟ୍ଟା ଲାଗିଛି ?
ଡାଙ୍ଗରେ ମହୁ ଖାଇ ମହୁଖିଆ ଉଲ୍ଲା ପରି
ମୋ କାକୁସ୍ଥ ପଣରେ ତୁମକୁ ମଜ୍ଜା ଆସୁଛି ?

ମୋ ସୁନା ଟା ପରା…
ଥରୁଟିଏ ମୋ ଆଡ଼କୁ ତ ଚାହଁ
ତୁମେ ବୋଧହୁଏ ଭୁଲି ଯାଇଛ
ତୁମ ସ୍ତ୍ରୀ ଟି ଏ ଘର ବୋହୁ !
ସାଂସାରିକ ଜୀବନ ଜଞ୍ଜାଳର
ଦିନଚର୍ଯ୍ୟାରେ ବାନ୍ଧି ହୋଇ
ଛୋଟବଡ଼ ତମାମ ଘରକରଣା ବୁଝିବୁଝି
ବୋଉଙ୍କୁ ଔଷଧ,
ବାବାଙ୍କୁ କ୍ଷୀର ଦେଇ ଆସି ଦେଖେ ତ
ତୁମ ମୁହଁ ପାଲଟିଛି ଉଷୁନା ହାଣ୍ଡି !

ଏଥର ମାନିଯାଅ
କାନ ଧରୁଛି, ସତ କହୁଛି
କାନ୍ଦି ଦେବି ଯେ…
ଉଁ…ଉଁ…ଉଁ
କଣ ଏକା ତୁମକୁ ଆସେ କି ଅଭିନୟ ?
କିଛି ଟା ମୁଁ ବି କରିପାରେ
ଏଇ ଟିକକ ଲୁହ
ଖୋଲିଦେଲା ନା ମୁଖା ତୁମ ଅଭିନୟର ।

ମୁଁ ଜାଣେ ତୁମେ ସହିଯିବ
ସବୁ ଦୁଃଖ ଯନ୍ତ୍ରଣା ଏ ସଂସାରର
କିନ୍ତୁ ସହିପାରନା ବିନ୍ଦୁଟିଏ ବି ଲୁହ
ମୋ ଆଖିର ।
★★★★★★
#ଦୀପିକା ଦାଶ

 25 total views,  3 views today

Leave a Reply

Your email address will not be published. Required fields are marked *