କୁମାର ପୂର୍ଣ୍ଣିମା
🌼🌼🌼🌼
ବିନୋଦିନୀ ଦାଶ
🦋🦋🦋🦋🦋
ନଦୀ ପଠାମାଳେ କାଶତଣ୍ଡୀ ହସେ
ଦୋଳାଇ ତାହାର ଶ୍ବେତ ଚାମର
ଶେଫାଳୀ ସୁମନ ହସ ଉକୁଟାଇ
ସାନ୍ଧ୍ୟେ ମେଲିଦିଏ ଶୋଭା ସମ୍ଭାର
ଶରଦ ଆକାଶେ ଚାନ୍ଦ ଜୋଛନା
କୁମାରୀ ପ୍ରାଣକୁ କରେ ହିଲ୍ଲୋଳିତ
ସିଏ ସ୍ବାଗତ କୁମାର ପୂର୍ଣ୍ଣିମା ।
ଏଶୁଭ ତିଥିରେ ଗଜଲକ୍ଷ୍ମୀ ପୂଜା
ପୁଣି କୁମାର କାର୍ତ୍ତିକେୟ ଜନ୍ମ
ମୃଣ୍ମୟୀ ପ୍ରତିମା ନିର୍ମାଣ କରାଇ
ପୂଜନ ହୁଅଇ ଗ୍ରାମ୍ୟ ଭୁବନ
କାର୍ତ୍ତିକେୟ ସମ ବର ଇଚ୍ଛାରେ
କୁମାରୀଏ ମିଶି ଚଉଁରା ମୂଳରେ
ଚାନ୍ଦ ପୂଜିଥାନ୍ତି ହରଷ ଭରେ ।
ପାଦରେ ଅଳତା ମଥାରେ କୁଙ୍କୁମ
ନୂତନ ବସ୍ତ୍ରରେ ହୋଇ ମଣ୍ଡିତ
ଉପବାସ ରହି କୁମାରଙ୍କୁ ସ୍ମରି
ହୃଦୟ ହୁଏ ଭାବେ ବିହ୍ବଳିତ
ଭକତି ରସରେ ହୋଇ ପ୍ଳାବିତ
ମଧୁଛନ୍ଦ ତୋଳି ଗାଇ ଉଠିଥାନ୍ତି
“କୁଆଁର ପୂନେଇ ଜହ୍ନ ଲୋ” ଗୀତ ।
ଆଶ୍ବିନ ପୂର୍ଣ୍ଣିମା କୁମାର ପୂର୍ଣ୍ଣିମା
ଆଜି ବି ଘୋଷିତ ଆମ ମରତ
କୁମାରୀଏ’ଛନ୍ତି ଚାନ୍ଦ ବି ଉଉଁଛି
କାର୍ତ୍ତିକେୟ ବି ହୁଅନ୍ତି ପୂଜିତ
ମାତ୍ର ମନେ ନାହିଁ ପୂର୍ବ ସରାଗ
ସମୟ ସାଥିରେ ମନ ବଦଳୁଛି
ପାଶ୍ଚତ୍ୟ ସଭ୍ୟତାରେ ଅନୁରାଗ ।
ଉତ୍କଳୀୟ ପରମ୍ପରା ସଂସ୍କୃତିରେ
ସତେ ଯେମିତି ଗ୍ରହଣ ଲାଗିଛି
ପରପିଢ଼ି ପର୍ବପର୍ବାଣିର ସାଥେ
ଜୀଇଁବ କି ନାହିଁ ଅଜଣା ଅଛି
ତଥାପି ମନରେ ନାହୁଁ ଦୁର୍ବଳ
ସେସବୁ ଜୀଆଁଇ ରଖିବା ପାଇଁକି
ସରବଦା ଜାରି ଚେଷ୍ଟା ପ୍ରବଳ ।
••••••••••••••••••