*🌹ଋତୁ ରାଣୀ🌹*
——————–
*ପ୍ରତାପ କିଶୋର ରାଉତ*
🌹🥀🌷🌺🌻💐🌸
ଋତୁ ରାଣୀ!
ବର୍ଣ୍ଣ ବିଭା ର ଚାତୁରି
ତୁମ ଅଙ୍ଗେ ଅଙ୍ଗେ ସୁଶୋଭିତ
ତୁମ ଆଗମନେ କାଶତଣ୍ଡି ଚାମର ହଲାଏ
ସରସୀ ର କାଚକେନ୍ଦୁ ପାଣିରେ
ନୀଳ ଆକାଶ ପ୍ରତିବିମ୍ବିତ,
ଜୋଛନା ର ପରଶ ରେ ଦିଗାଙ୍ଗନା
ଗାଉଛନ୍ତି ଆଗମନୀ ର ଆବାହନୀ ସଙ୍ଗୀତ
ନିଶୀଥ ରେ କୁମୁଦିନୀ ଗାଉଅଛି
ପ୍ରଣୟ ର ଅନ୍ତାକ୍ଷରୀ ବିଭୋର ମନ ରେ
ସାଗର ତରଙ୍ଗ ରେ ହିଲ୍ଲୋଳିତ
ମନ୍ଦ୍ର ମଧୁର ଧ୍ୱନି ର ପୁଲକ ,
ନିର୍ମଳ ଆକାଶ ରେ ବାଦଲ ର
ଚିତ୍ରିତ ବର୍ଣ୍ଣାଳି
ଯୁଥ ଯୁଥ ସୁମନ ସମ୍ଭାର ରେ
ପ୍ରକୃତି ର ଅଗଣା ସୁଶୋଭିତ
ଚପଳଛନ୍ଦା ଋତୁରାଣୀ !
ତୁମ ପାଉଁଜି ର ଛମ ଛମ ତାଳେ ତାଳେ
ଯୁବତୀ କଣ୍ଠ ରେ ପୁରବୀ ର ଛନ୍ଦ
ମୋହି ନିଏ ବିଧୁର ପ୍ରାଣ ର
ପୁଞ୍ଜିଭୁତ ଅୟୁତ ଯୁଗ ର ଯନ୍ତ୍ରଣା,
ଋତୁରାଣୀ! ତୁମ ଆଗମନେ
ପାର୍ବଣ ର ନହବତ ମନ୍ଦ୍ରିତ ଚଉଦିଗେ
ମା’ ଙ୍କର ଆବାହନେ ବେଶ ଉଲ୍ଲସିତ
କୋଟି କୋଟି ସ୍ପନ୍ଦନୀତ ପ୍ରାଣ
ଅନ୍ୟାୟ ଅନୀତି ର ପଶା ପାଲିରେ
ଗଡୁଥିବା ଅହଂକାର ଗୋଟି ସବୁ
ଧୂଳିସାତ ହୋଇ ହରାଇବେ ସ୍ପର୍ଦ୍ଧିତ ଅସ୍ତିତ୍ବ
ଶୁଭ ଶଙ୍ଖେ ନିନାଦିତ ହେବ
ସସା ଗରା ଧରା ର କୋଣ ଅନୁକୋଣ
ମଥା ନଇଁ ଯାଇ ଥିବା ବିଶ୍ୱାସ ସବୁ
ମୁଣ୍ଡ ଟେକି ଗାଉଥିବେ
ତ୍ରାହି ମାଂ ଜଗଦମ୍ବେ,ତ୍ରାହିମାଂ ଜଗଦମ୍ବେ,
🌺🌷🌹🍁🥀🌸💐🌻
ପ୍ରତାପ କିଶୋର ରାଉତ
