*ଛନ୍ଦା ଚରଣରେ ବନ୍ଧା ଏ ପରାଣ- ପ୍ରଶାନ୍ତ କୁମାର ଶତପଥୀ*

🙏ଛନ୍ଦା ଚରଣରେ ବନ୍ଧା ଏ ପରାଣ🙏

***************

ଗୋପୀ ପ୍ରାଣ ଧନ ହେ ଛନ୍ଦା ଚରଣ

ତୋ’ ପାଦେ ଗଲି ଶରଣ,

ପିତାମ୍ବର ପିନ୍ଧା ଭକ୍ତି ରସେ ବନ୍ଧା

ଆହେ ପ୍ରଭୁ ନାରାୟଣ l

କର୍ଣ୍ଣ ଶୁଣୁ ମୋର ବଇଁଶୀର ସ୍ୱର

ହୃଦୟରେ ଗୁଞ୍ଜରଣ,

ଆହେ ବାସୁଦେବ କେଶବ ମାଧବ

ଅଧମ କରେ ଜଣାଣ l

ଜଗତର ଗୁରୁ ଆହେ ମହାମେରୁ

ଗୁହାରି ମୋହର ଶୁଣ,

ହେ ରାଧିକାପ୍ରିୟ ହୁଅହେ ସହାୟ

ଧନ୍ୟ ତୁମ ବଡ଼ ପଣ l

ଦେବକୀ ନନ୍ଦନ ଶ୍ରୀବତ୍ସଲାଞ୍ଚନ

ପାପୀଙ୍କୁ କର ତାରଣ,

ତୋ’ର ନାମ ଗାଇ ରୂପ ତୋର ଧ୍ୟାୟୀ

ଯାଉ ଏ ପାପ ପରାଣ l

ନାହିଁ ମୋର ଜ୍ଞାନ କଳୁଷିତ ମନ

ନନ୍ଦନନ୍ଦନ ଶରଣ,

ତୋର ନାମ ସ୍ମରି ଦିନ ଯାଉ ସରି

ମନ ମୋ କରିଛି ଟାଣ l

##############

ପ୍ରଶାନ୍ତ କୁମାର ଶତପଥୀ 

ଛତ୍ରପୁର, ଗଞ୍ଜାମ